డబ్బింగ్ స్టార్ట్ చేసిన 'టక్ జగదీష్'

నేచుర‌ల్ స్టార్ నాని నటిస్తున్న లేటెస్ట్ ఫ్యామిలీ అండ్ యాక్షన్ ఎంట‌ర్‌టైన‌ర్ ''టక్ జగదీష్''. శివ నిర్వాణ దర్శకత్వం వహిస్తున్న ఈ చిత్రాన్ని షైన్ స్క్రీన్స్ బ్యాన‌ర్‌ పై సాహు గార‌పాటి - హ‌రీష్ పెద్ది సంయుక్తంగా నిర్మిస్తున్నారు. ఇందులో రీతూ వ‌ర్మ‌ - ఐశ్వ‌ర్యా రాజేష్ హీరోయిన్లుగా నటిస్తున్నారు. క్రిస్మస్ సందర్భంగా విడుదలైన ఈ సినిమా ఫస్ట్ లుక్ పోస్టర్ సినిమాపై అంచనాలను పెంచేసింది. ఒకే పోస్టర్ తో అటు క్లాస్ ని ఇటు మాస్ ని ఆకట్టుకున్నాడు జగదీష్ నాయుడు. షూటింగ్ చివరి దశలో ఉన్న ఈ చిత్రానికి సంబంధించిన పోస్ట్ ప్రొడక్షన్ కార్యక్రమాలు జరుపుతున్నారు.

తాజాగా హీరో నాని 'టక్ జగదీష్' సినిమా డబ్బింగ్ పనులు మొదలు పెట్టినట్లు తెలుస్తోంది. ఈ చిత్రాన్ని 2021 సమ్మర్ కానుకగా ఏప్రిల్ నెలలో ప్రేక్షకుల ముందుకు తీసుకురాబోతున్నారు. ఈ చిత్రానికి ఎస్.ఎస్‌. థమన్ మ్యూజిక్ అందిస్తున్నారు. ప్ర‌సాద్ మూరెళ్ల సినిమాటోగ్రాఫ‌ర్‌ గా వ్యవహరిస్తుండగా.. ప్ర‌వీణ్ పూడి ఎడిటింగ్ వర్క్ చేస్తున్నారు. ఈ చిత్రంలో నాజర్ - డేనియల్ బాలాజీ - ప్రియదర్శి - తిరువీర్ - రోహిణి - ప్రవీణ్ తదితరులు నటిస్తున్నారు. నాని కెరీర్లో 26వ చిత్రంగా వస్తున్న 'టక్ జగదీష్' పై ఫ్యాన్స్ హోప్స్ పెట్టుకున్నారు. 'నిన్నుకోరి' వంటి బ్లాక్ బస్టర్ సినిమా త‌ర్వాత నాని - శివ నిర్వాణ కాంబోలో మరో సూపర్ హిట్ రాబోతోందని నమ్మకంగా ఉన్నారు.