తమిళ 'అర్జున్‌ రెడ్డి' క్రియేటర్‌ తో వైష్ణవ్‌ తేజ్‌

మెగా హీరో వైష్ణవ్‌ తేజ్ మూడవ సినిమా ప్రకటన కోసం సినీ జనాలు మరియు మెగా అభిమానులు ఆసక్తిగా ఎదురు చూస్తున్నారు. మొదటి సినిమా ఉప్పెన తో అద్బుత విజయాన్ని దక్కించుకున్న వైష్ణవ్‌ తేజ్‌ రెండవ సినిమా ను ఇప్పటికే క్రిష్‌ దర్శకత్వంలో చేసిన విషయం తెల్సిందే. కొండ పొలం అనే నవల ఆధారంగా రూపొందిన ఆ సినిమా విడుదలకు గురించిన అధికారిక ప్రకటన ఏ క్షణంలో అయినా రావచ్చు అంటున్నారు. సేఫ్‌ జోన్‌ చూసి విడుదల చేసే అవకాశాలు ఉన్నాయ. ఈ సమయంలోనే వైష్ణవ్‌ తేజ్‌ మూడవ సినిమా గురించిన ఆసక్తికర ప్రచారం జరుగుతోంది.

చాలా రోజుల నుండి వైష్ణవ్‌ తేజ్ మూడవ సినిమా ను బీవీఎస్ఎన్‌ ప్రసాద్‌ నిర్మించబోతున్నాడు అంటూ వార్తలు వస్తున్నాయి. ఉప్పెన సమయంలోనే బీవీఎస్‌ఎన్‌ ప్రసాద్‌ హీరో వైష్ణవ్‌ తేజ్ కు అడ్వాన్స్ ఇచ్చాడట. తాజాగా నిర్మాత బీవీఎస్‌ఎన్‌ ప్రసాద్‌ దర్శకుడు గిరీషయ్య వద్ద ఉన్న కథను వైష్ణవ్‌ తేజ్ కోసం ఓకే చేశాడని తెలుస్తోంది. వైష్ణవ్‌ మరియు మెగా ఫ్యామిలీకి చెందిన కొందరు కూడా కథను విని గ్రీన్‌ సిగ్నల్‌ ఇచ్చారని తెలుస్తోంది. స్క్రిప్ట్‌ లో చిన్న చిన్న మార్పులు చేసేసి సినిమా ను పట్టాలెక్కించేందుకు గిరీషయ్య సిద్దం అవుతున్నాడు.

బ్లాక్‌ బస్టర్‌ అర్జున్‌ రెడ్డి సినిమాకు అసోసియేట్‌ డైరెక్టర్‌ గా వ్యవహరించిన గీరిషయ్య తమిళంలో అర్జున్‌ రెడ్డి రీమేక్ ను చేశాడు. ఆ సినిమా సూపర్‌ హిట్‌ అవ్వడంతో గిరీషయ్య క్రేజీ డైరెక్టర్‌ ల జాబితాలో చేరాడు. అందుకే వైష్ణవ్‌ తేజ్ కోసం ఆయన్ను ఎంపిక చేశారనే వార్తలు వస్తున్నాయి. ఏప్రిల్‌ లేదా మే నెలలో ఈ సినిమా ను పట్టాలెక్కించే అవకాశం ఉందట. ఇక వైష్ణవ్‌ తేజ్‌ మూడవ సినిమా కోసం కేతికా శర్మ ను ఎంపిక చేశారనే ప్రచారం కూడా జరుగుతోంది.