అక్కడ మాత్రం సంక్రాంతికి అతనే కింగ్

గత కొన్నేళ్లుగా సంక్రాంతికి పోటీ తగ్గుతూ వస్తోంది. దశాబ్దం కిందటిలాగా సంక్రాంతికి ఒకేసారి నాలుగైదు సినిమాలు రిలీజ్ చేసే పరిస్థితి లేకపోయింది. ఫస్ట్ వీకెండ్ వసూళ్లు కీలకం కావడంతో రెండు సినిమాలకు మించి రిలీజ్ కాకుండా చూసుకుంటూ వచ్చారు. కానీ పోయినేడాది సంక్రాంతికి తెలుగులో విపరీతమైన పోటీ నెలకొంది. ఒకేసారి నాలుగు సినిమాలొచ్చాయి. అవన్నీ కూడా క్రేజ్ ఉన్నవే. ఈసారి కూడా పరిస్థితి భిన్నంగా ఏమీ లేదు. చిరు-బాలయ్యల మధ్య మహా పోరు జరగబోతోంది. వీళ్లకు పోటీగా శర్వా ‘శతమానం భవతి’తో వస్తున్నాడు. ఐతే తమిళనాట మాత్రం ఈసారి ఒకే స్టార్ హీరో బరిలో ఉన్నాడు. అతనే విజయ్. తమిళనాట కూడా పోయినేడాది సంక్రాంతికి తీవ్రమైన పోటీ ఉంది కానీ.. ఈసారి అలా ఏమీ లేదు. విజయ్ సోలోగా బాక్సాఫీస్‌ ను ఏలడానికి రెడీ అయిపోయాడు.

విజయ్ హీరోగా నటించిన ‘భైరవ’ భారీ అంచనాల మధ్య ప్రేక్షకుల ముందుకు రాబోతోంది. ‘పులి’ మినహాయిస్తే గత కొన్నేళ్లలో వరుసగా బ్లాక్ బస్టర్లు కొట్టిన విజయ్.. నిరుడు ‘తెరి’తో సూపర్ సక్సెస్‌ ను ఖాతాలో వేసుకున్నాడు. ‘భైరవ’ మీద కూడా అంచనాలు భారీగా ఉన్నాయి. ఈసారి విజయ్ సేతుపతి సినిమా ఒకటి.. ఇంకో రెండు చిన్న సినిమాలు సంక్రాంతికి రిలీజవుతున్నా అవి విజయ్ చిత్రానికి పోటీ ఇచ్చే స్థాయిలో లేవు. తమిళ ప్రేక్షకుల ఫోకస్ మొత్తం విజయ్ సినిమా మీదే ఉంది. సీనియర్ డైరెక్టర్ భరతన్ దర్శకత్వంలో రూపొందిన ఈ చిత్రంలో విజయ్ సరసన లక్కీ హీరోయిన్ కీర్తి సురేష్ కథానాయికగా నటించింది. ఇందులో విలన్ మన జగపతిబాబే కావడం విశేషం. విజయ్ మరో బ్లాక్ బస్టర్ కొట్టడం పక్కా అన్న అంచనాలు తమిళనాట ఉన్నాయి. ఈ చిత్రాన్ని తెలుగులోకి కూడా అనువాదం చేయబోతున్నారు. తమిళంలో విడుదలైన కొన్నాళ్లకు తెలుగులోకి వచ్చే అవకాశముంది.

Like Us on Facebook : https://www.facebook.com/Tupakidotcom/