మెగా హీరోకు విలన్ గా క్రేజీ హీరో!

ఒక సినిమాలో విలన్ పాత్ర ఎంత బలంగా ఉంటే హీరో పాత్ర అంతకంటే ఎక్కువగా హైలైట్ అవుతుంది.  అందుకే చాలామంది దర్శకులు విలన్ పాత్ర విషయంలో ఎంతో కసరత్తు చేస్తుంటారు.  పెద్ద హీరోల విషయంలోనే కాదు.. డెబ్యూ హీరోల విషయంలో కూడా ఇప్పుడు ఇలాంటి జాగ్రత్తలు తీసుకుంటున్నారు.  ఇప్పుడు మెగా ఫ్యామిలీ నుండి ఎంట్రీ ఇవ్వనున్న కొత్త మెగా హీరో పంజా వైష్ణవ్ తేజ్ డెబ్యూ సినిమా విషయంలో అదే సూత్రం ఫాలో అవుతూ స్ట్రాంగ్ విలన్ ను సెట్ చేసే ప్రయత్నం చేస్తున్నారట.

వైష్ణవ్ తేజ్ డెబ్యూ సినిమాను మైత్రీ మూవీ మేకర్స్ వారు.. సుకుమార్ సంయుక్తంగా నిర్మిస్తున్నారు.  ఈ సినిమాకు సుకుమార్ అసిస్టెంట్ బుచ్చిబాబు సాన దర్శకత్వం వహిస్తున్నాడు.  రంగస్థలం టైపులో ఒక రస్టిక్ విలేజ్ డ్రామాలా సాగే ఈ సినిమాలో విలన్ పాత్ర కోసం తమిళనాట సెన్సేషనల్ హీరోగా పేరు తెచ్చుకున్న విజయ్ సేతుపతిని సంప్రదించారని సమాచారం.  తన పాత్ర..  ఈ సినిమా కథ సేతుపతికి నచ్చాయని ఫార్మల్ గా నటించేందుకు అంగీకారం తెలిపాడని అంటున్నారు.  కాకపోతే విజయ్ సేతుపతి అధికారికంగా సైన్ చేయాల్సి ఉందట.  ఈ సినిమాకు సైన్ చేస్తే ఈ సినిమా రేంజ్ పెరుగుతుందనడంలో ఏమాత్రం సందేహం లేదు.  మెగా హీరో సినిమాను తమిళనాడులో కూడా రిలీజ్ చేసే అవకాశం ఉంటుంది.

విజయ్ సేతుపతి మెగాస్టార్ చిరంజీవి చిత్రం 'సైరా' ద్వారా టాలీవుడ్ ఎంట్రీ ఇస్తున్న సంగతి తెలిసిందే.  'సైరా' రిలీజ్ కాకముందే టాలీవుడ్ లో సేతుపతికి డిమాండ్ ఇలా ఉంటే.. రిలీజ్ అయిన తర్వాత మరింతగా పెరుగుతుందేమో.