దాని పై క్రిష్‌ కు ఎందుకింత ఆసక్తి?

చిన్న చిత్రాలతో దర్శకుడిగా పరచయం అయ్యి, తనకంటూ ప్రత్యేకమైన గుర్తింపును దక్కించుకున్న క్రిష్‌ ఇప్పుడు కమర్షియల్‌ చిత్రాల వైపు పరుగులు పెడుతున్నాడు. ఒక వైపు దర్శకుడిగా మరో వైపు నిర్మాతగా వరుసగా సినిమాలను, సీరియల్స్‌ ను నిర్మిస్తున్నాడు. సినిమాలు, సీరియల్స్‌ మాత్రమే కాకుండా ఇప్పుడు వెబ్‌ సిరీస్‌ లపై కూడా క్రిష్‌ దృష్టి పెట్టాడు. క్రిష్‌ ఒక వెబ్‌ సిరీస్‌ ను తన సన్నిహితులతో నిర్మించేందుకు సిద్దం అయ్యాడు. అతి త్వరలోనే అందుకు సంబంధించిన ఏర్పాట్లు కూడా పూర్తి కాబోతున్నాయి.

క్రిష్‌ వెబ్‌ సిరీస్‌ అంటే అదేదో తెలుగులో ఉండే అవకాశం ఉందని అంతా భావించొచ్చు. కాని అనూహ్యంగా క్రిష్‌ తమిళ భాషలో వెబ్‌ సిరీస్‌ ను నిర్మించబోతున్నాడు. రాజ రాజ చోళ అనే టైటిల్‌ తో ఛారిత్రాత్మక నేపథ్యంలో నిర్మించబోతున్నాడు. ఈ వెబ్‌ సిరీస్‌ ను ప్రముఖ తమిళ దర్శకుడు సురేష్‌ కృష్ణ తెరకెక్కించబోతున్నాడు. గతంలో భాష, మాస్టర్‌ చిత్రాలతో పాటు ఇంకా పలు సూపర్‌ హిట్‌ చిత్రాలను అందించిన దర్శకుడు సురేష్‌ కృష్ణ ఈ చిత్రానికి దర్శకత్వం వహించబోతున్న నేపథ్యంలో రాజ రాజ చోళ వెబ్‌ సిరీస్‌ పై అంచనాలు భారీగా ఉన్నాయి.

తెలుగు, హిందీల్లో ఇప్పటికే మంచి గుర్తింపు ఉన్న క్రిష్‌ కు తమిళంలో ఈ వెబ్‌ సిరీస్‌ తో మంచి గుర్తింపు రావడం ఖాయం అంటున్నారు. నిర్మాతగా క్రిష్‌ ఇప్పటికే పలు సినిమాలు నిర్మించినప్పటికి ఈ వెబ్‌ సిరీస్‌ చాలా ప్రత్యేకం అంటున్నారు. ప్రస్తుతం వెబ్‌ సిరీస్‌ ల సందడి కొనసాగుతున్న నేపథ్యంలో క్రిష్‌ ఈ నిర్ణయాన్ని తీసుకున్నాడు. రాజ రాజ చోళ వెబ్‌ సిరీస్‌ ను తెలుగులో కూడా డబ్‌ చేయనున్నారు. ఛారిత్రాత్మక నేపథ్యంలో వెబ్‌ సిరీస్‌ అవ్వడం వల్ల భారీగానే ఖర్చు పెట్టాల్సి ఉండవచ్చు. భారీ ఖర్చుతో వెబ్‌ సిరీస్‌ అంటే వర్కౌట్‌ అయ్యేనా చూడాలి. వర్కౌట్ విషయాన్ని పక్కన పెట్టి క్రిష్ ఈ వెబ్ సిరీస్ ను ఆసక్తితో నిర్మిస్తున్నట్లుగా తెలుస్తోంది.