వర్మని ఎదుర్కోడానికి మెగా - నందమూరి ఫ్యాన్స్ ఏకం అవుతారా...?

సెన్సేషనల్ డైరెక్టర్ రామ్ గోపాల్ వర్మ ''పవర్ స్టార్'' అనే కాంట్రవర్సీ టైటిల్ తో సినిమా తెరకెక్కించిన విషయం తెలిసిందే. పవర్ స్టార్ పవన్ కళ్యాణ్ ని పోలిన ప్రవన్ కళ్యాణ్ ఈ సినిమాలో హీరో అని పరిచయం చేశాడు. ఇప్పటికే ఫస్ట్ లుక్ తో పవర్ స్టార్ ఫ్యాన్స్ ఆగ్రహానికి గురైన వర్మ రేపు పే పర్ వ్యూ విధానంలో ట్రైలర్ రిలీజ్ చేయబోతున్నారు. ఇక 'పవర్ స్టార్' సినిమా జూలై 25న ఆర్జీవీ వరల్డ్ థియేటర్ లో రిలీజ్ చేయబోతున్నారు. ఈ నేపథ్యంలో పవన్ కళ్యాణ్ అభిమానులు రామ్ గోపాల్ వర్మకి కౌంటర్ గా 'పరాన్నజీవి' - Reckless Genetic Virus అనే సినిమా అనౌన్స్ చేశారు. ఇప్పటికే ''పరాన్నజీవి'' సినిమా నుండి 'పరాన్నజీవి.. జీవి నిర్జీవి ఆర్జీవీ..' అంటూ సాగే ఓ పాటను ఆర్జీవీని టార్గెట్ చేస్తూ రిలీజ్ చేసారు. శ్రేయాస్ ఈటీ ఏటీటీలో ఈ సినిమా విడుదల చేయబోతున్నారని సమాచారం.

ఇదిలా ఉండగా రామ్ గోపాల్ తదుపరి ప్రాజెక్ట్ సీనియర్ హీరో నందమూరి బాలకృష్ణ ని టార్గెట్ చేస్తూ తీయబోతున్నాడని ప్రచారం జరుగుతోంది. అప్పట్లో బాలయ్య ప్రముఖ నిర్మాత బెల్లంకొండ సురేష్ ను గన్ తో షూట్ చేసిన ఇన్సిడెంట్ ని ఆధారంగా చేసుకొని ''ఆ రాత్రి ఏమైంది?'' అనే టైటిల్ తో ఈ సినిమా రూపొందించనున్నారని ఇండస్ట్రీ వర్గాల్లో చర్చించుకుంటున్నారు. ఈ నేపథ్యంలో ఇప్పుడు బాలయ్య ఫ్యాన్స్ పవన్ కళ్యాణ్ ఫ్యాన్స్ కి సపోర్ట్ చేస్తారా అని సోషల్ మీడియాలో ఆసక్తికరమైన చర్చ జరుగుతోంది. బాలయ్య ఫ్యాన్స్ ముందే అలర్టై పవన్ కళ్యాణ్ ఫ్యాన్స్ తెరకెక్కిస్తున్న 'పరాన్నజీవి' సినిమాకి సపోర్ట్ చేస్తారని అనుకుంటున్నారు. ఎందుకంటే వర్మ నెక్స్ట్ టార్గెట్ బాలయ్య అని న్యూస్ స్ప్రెడ్ అవుతుండటంతో అప్పుడు బాలయ్య ఫ్యాన్స్ కి పవన్ కళ్యాణ్ అభిమానులు సపోర్ట్ గా వస్తారని అభిప్రాయపడుతున్నారు. అందుకే ఇప్పుడు పీకే ఫ్యాన్స్ తో కలిసి 'పరాన్నజీవి'కి మద్దతు తెలిపి సూపర్ హిట్ చేస్తారని.. వర్మని ఎదుర్కోడానికి మెగా ఫ్యాన్స్ - నందమూరి ఫ్యాన్స్ కలవబోతున్నాయని నెటిజన్స్ డిస్కషన్ చేసుకుంటున్నారు.