హాలీవుడ్‌లో కూడా సౌత్ మ‌సాలాయేనా?
అదంతా అటుంచితే అట్లీ తదుపరి షారూఖ్- విజయ్ ల‌తో హాలీవుడ్ రేంజ్ సినిమా తీస్తున్నాడ‌న్న ప్ర‌చారం వేడెక్కిస్తోంది. వివ‌రాల్లోకి వెళితే.
కోలీవుడ్ అగ్ర ద‌ర్శ‌కుడు అట్లీ .. రాజమౌళి త‌ర్వాత అత్యంత భారీ పారితోషికం అందుకునే ప్ర‌ముఖుడిగా ఎదిగాడు. ఒక్కో సినిమాకి 50కోట్ల పారితోషికంతో పాటు లాభాల్లో వాటా అందుకుంటున్నాడ‌ని క‌థ‌నాలొస్తున్నాయి. అత‌డు ఇటీవ‌లే బాలీవుడ్ లో అడుగుపెట్టి బ్లాక్ బ‌స్ట‌ర్ విజ‌యం అందుకున్నాడు. కింగ్ ఖాన్ షారూఖ్ కి రెండో 1000 కోట్ల క్ల‌బ్ చిత్రాన్ని అందించిన ఘ‌న‌త అట్లీ సొంత‌మైంది. షారూఖ్ జవాన్ తో అట్లీ కుమార్ పేరు బాలీవుడ్ లోను మార్మోగింది. కానీ అత‌డు తెర‌కెక్కించిన జవాన్ రొటీన్ మసాలా చిత్రం అన్న విమ‌ర్శ‌ల్ని కూడా ఎదుర్కొంది. అదంతా అటుంచితే అట్లీ తదుపరి షారూఖ్- విజయ్ ల‌తో హాలీవుడ్ రేంజ్ సినిమా తీస్తున్నాడ‌న్న ప్ర‌చారం వేడెక్కిస్తోంది. వివ‌రాల్లోకి వెళితే.
జవాన్ ఇప్పటికే విడుద‌లై బాక్సాఫీస్ వ‌ద్ద విజ‌యం సాధించింది. అంత‌కుముందు చెన్నైలో జవాన్ షూటింగ్ ప్రారంభించినప్పటి నుండి దళపతి విజయ్ ఈ చిత్రంలో భాగమవుతున్నారనే పుకార్లు వ‌చ్చాయి. చివ‌రికి జవాన్ లో తమిళ సూపర్‌స్టార్ విజ‌య్‌ను అతిధి పాత్రలో చూడకపోవడంతో అభిమానులు నిరాశకు గురైన సంగ‌తి తెలిసిందే. ఇంత‌లోనే ఇప్పుడు అట్లీ ప్రకటన అంద‌రినీ ఆశ్చర్యపరిచింది. అట్లీ తాను ఇద్దరు సూపర్‌స్టార్‌లతో సినిమా చేయడానికి ప్లాన్ చేస్తున్నానని ధృవీకరించాడు. హీరోలు ఇప్పటికే అంగీకరించార‌ని కూడా తెలిపారు. ఇప్పుడు కింగ్ ఖాన్ షారూఖ్- దళపతి విజయ్ కాంబినేష‌న్ సినిమాను అట్లీ అధికారికంగా ధృవీకరించారు.
ప్ర‌ముఖ టీవీ ప్రెజెంటర్ గోపీనాథ్‌కి ఇచ్చిన ఇంటర్వ్యూలో, షారుఖ్ ఖాన్-దళపతి విజయ్ తన పుట్టినరోజు వేడుకలకు హాజరైనప్పుడు ఈ ప్రాజెక్ట్ గురించి చర్చించుకున్నారని అట్లీ వెల్లడించారు. అట్లీ తన పుట్టినరోజు వేడుక‌ల్లో ఇద్దరు సూపర్‌స్టార్లు కలిసి ఉన్న ఓ ఫోటోను పోస్ట్ చేయ‌గా అది అప్ప‌ట్లో వైర‌ల్ అయిన సంగ‌తి తెలిసిన‌దే. అయితే ఈ ఫోటోగ్రాఫ్‌ జవాన్ లో విజయ్ అతిధి పాత్ర గురించి ఊహాగానాలకు ఆజ్యం పోసింది. అప్ప‌ట్లోనే విజయ్ -SRK ఒక‌రితో ఒక‌రు చర్చించుకున్నారని, భవిష్యత్తులో అట్లీ ఎప్పుడైనా ఇద్దరు హీరోల చిత్రాన్ని ప్లాన్ చేస్తే, ఇద్దరూ అందులో న‌టించ‌డానికి సిద్ధంగా ఉన్నామ‌ని తెలియజేసార‌ని కూడా అట్లీ వెల్లడించారు.
ఇద్దరు అగ్ర హీరోల‌తో భారీ ఎంటర్‌టైనర్ గురించి అట్లీ మాట్లాడుతూ.. ఈ క్రేజీ ప్రాజెక్ట్ కార్యరూపం దాల్చాలని తాను కోరుకుంటున్నా కానీ ఈ చిత్రం ప్రారంభ దశలో కూడా లేదని, తాను ఇంకా పనిని ప్రారంభించలేదని కూడా చెప్పాడు. నేను దానిపై పని చేస్తాను. ఇది నా తదుపరి చిత్రం కావచ్చు. దాని కోసం స్క్రిప్ట్‌ని రూపొందించడానికి నేను చాలా కష్టపడుతున్నాను.. అని కూడా అట్లీ అన్నారు. ఇటీవల విడుదలైన 'జవాన్' హిందీ, తమిళం, తెలుగు భాషలలో విడుదలైంది. ఈ సంవత్సరంలో అతిపెద్ద విడుదలలలో ఒకటిగా నిలిచింది. నయనతార, విజయ్ సేతుపతి ఇందులో కీల‌క పాత్ర‌లు పోషించారు.
విమ‌ర్శ‌కుల‌కు స‌మాధానం కావాలి:
సెప్టెంబర్ 7న విడుదలైన జవాన్ ఫ‌క్తు మాస్ మసాలా యాక్ష‌న్ ఎంట‌ర్ టైన‌ర్. ఈ సినిమాకి స‌మీక్ష‌కుల నుంచి మిశ్ర‌మ స్పంద‌న‌లు వ్య‌క్త‌మ‌య్యాయి. అట్లీ రొటీన్ సౌత్ మసాలా ఫార్ములాను తిరిగి ఉప‌యోగించాడ‌ని విమ‌ర్శ‌లొచ్చాయి. ప్ర‌థ‌మార్థం ఆక‌ట్టుకున్నా కానీ ద్వితీయార్థం రొటీన్ గా ఉంద‌ని కూడా క్రిటిక్స్ విమ‌ర్శించారు. అందుకే ఇప్పుడు అత‌డు విజయ్-షారూఖ్‌ల‌తో హాలీవుడ్ రేంజ్ సినిమా చేస్తున్నాను అని లీకులివ్వ‌గానే, అక్క‌డ కూడా రొటీన్ సౌత్ ఫార్ములాటిక్ సినిమా తీస్తావా? అంటూ ఒక సెక్ష‌న్ విమ‌ర్శ‌కులు ప్ర‌శ్నిస్తున్నారు. ఒక‌వేళ ఇద్దరు బ‌డా స్టార్ల‌తో హాలీవుడ్ రేంజు సినిమా తీస్తే గ‌నుక క‌థ, కంటెంట్ విష‌యంలో చాలా జాగ్ర‌త్త‌లు అవ‌స‌ర‌మ‌ని, రొటీన్ ఫార్ములాటిక్ సినిమా వ‌ర్క‌వుట్ కాదని కూడా సూచిస్తున్నారు.