మధ్య తరగతి ఫ్యామిలీకి చెందిన యువకుడిగా హీరో!

యంగ్ రెబల్‌ స్టార్ ప్రభాస్ ప్రస్తుతం చేస్తున్న సలార్, ప్రాజెక్ట్ కే కల్కి సినిమాల కంటే కూడా ఆయన అభిమానులు ఎంతో ఆసక్తిగా ఎదురు చూస్తున్న చిత్రం 'స్పిరిట్‌'. ఈ సినిమాకి అర్జున్‌ రెడ్డి దర్శకుడు సందీప్ వంగ దర్శకత్వం వహించబోతున్న విషయం తెల్సిందే. సందీప్ వంగ ప్రస్తుతం యానిమల్ సినిమాను ప్రేక్షకుల ముందుకు తీసుకు వచ్చే పనిలో ఉన్నాడు.

యానిమల్‌ సినిమా ప్రమోషన్ లో భాగంగా ప్రభాస్ తో తాను చేయబోతున్న స్పిరిట్‌ సినిమాకు సంబంధించిన విషయాలను మీడియాతో సందీప్ వంగ పంచుకున్నాడు. ఇప్పటికే కథ రెడీ అయిందని, వచ్చే ఏడాది ప్రీ ప్రొడక్షన్‌ వర్క్‌ ని మొదలు పెట్టబోతున్నట్లుగా దర్శకుడు సందీప్ వంగ ప్రకటించాడు.

తాజాగా స్పిరిట్ గురించి దర్శకుడు సందీప్ వంగ మరో ఆసక్తికర విషయాన్ని వెళ్లడించాడు. తన గత చిత్రం అర్జున్‌ రెడ్డి తో పాటు రేపు రాబోతున్న యానిమల్ సినిమా లో హీరోలు బాగా డబ్బున్న ఫ్యామిలీకి చెందిన వారు అయ్యి ఉంటారు. కానీ స్పిరిట్ లో ఒక మధ్య తరగతి ఫ్యామిలీకి చెందిన యువకుడిగా హీరో కనిపించబోతున్నాడు అంటూ సందీప్ చెప్పుకొచ్చాడు.

స్పిరిట్ సినిమాను సెప్టెంబర్‌ 2024 లో షూటింగ్ ప్రారంభించాలని భావిస్తున్నారు. యానిమల్ సినిమా హిట్ అయితే ఇంకాస్త ముందుగానే ప్రారంభం అయినా ఆశ్చర్యం లేదు. మొత్తానికి స్పిరిట్‌ సినిమా తో సందీప్ వంగ మరియు ప్రభాస్ లు సెన్షేషన్‌ క్రియేట్‌ చేసే అవకాశాలు పుష్కలంగా కనిపిస్తున్నాయి.