ప్రభాస్‌ ఏరి కోరి ఆ గెస్ట్‌ రోల్‌ చేస్తానన్నాడు..!

కెరీర్‌ ఆరంభం నుంచి మంచు విష్ణు ఎన్నో సినిమాల్లో నటించి ప్రేక్షకుల ముందుకు తీసుకు వచ్చాడు. కానీ వాటిల్లో ఏ ఒక్క సినిమాకు దక్కని బజ్ ప్రస్తుతం ఆయన నటిస్తూ నిర్మిస్తున్న 'కన్నప్ప' సినిమాకు దక్కింది. సుదీర్ఘ కాలంగా మంచు విష్ణు ఈ సినిమాను చేయాలని కోరుకుంటున్న విషయం తెల్సిందే.

ప్రస్తుతం కన్నప్ప షూటింగ్ జరుగుతోంది. ఈ సినిమాను పాన్‌ ఇండియా రేంజ్ లో భారీ స్టార్ కాస్టింగ్‌ తో విష్ణు నిర్మిస్తున్నాడు. ప్రభాస్‌, అక్షయ్ కుమార్‌, మోహన్ లాల్‌, నయనతార ఇలా ఎంతో మంది స్టార్స్‌, సూపర్ స్టార్స్‌ నటిస్తున్న కన్నప్ప సినిమాలో ఎవరు ఏ పాత్ర లో కనిపించబోతున్నారు అనే ఆసక్తి అందరిలో ఉంది.

ప్రభాస్‌ ను కన్నప్ప సినిమాలో శివుడి పాత్రలో చూపించబోతున్నారు అనే వార్తలు వచ్చాయి. ఆ తర్వాత ప్రభాస్ నందీశ్వరుడు పాత్రను చేస్తున్నాడనే వార్తలు వస్తున్నాయి. తాజాగా విష్ణు ఆ విషయమై స్పందిస్తూ.. ప్రభాస్‌ ను కన్నప్ప సినిమాలో ఒక ముఖ్య పాత్ర కోసం అనుకుని సంప్రదించాం.

కథ విన్న తర్వాత మేము అనుకున్న పాత్ర కాకుండా మరో పాత్రను ఏరి కోరి మరీ ప్రభాస్ చేసేందుకు ఆసక్తి చూపించాడు. ఆ పాత్ర ఏంటి అనేది ఇప్పుడే మేము చెప్పలేము అన్నాడు. ఖచ్చితంగా ప్రభాస్ తో పాటు ప్రతి ఒక్కరు కూడా ఈ సినిమా ద్వారా ప్రేక్షకులను అలరిస్తారు అంటూ మంచు విష్ణు నమ్మకం వ్యక్తం చేశాడు.

ఇటీవలే కన్నప్ప షూటింగ్‌ లో ప్రభాస్ జాయిన్‌ అయ్యాడు. వారం నుంచి పది రోజుల పాటు షూట్‌ లో ప్రభాస్ పాల్గొనే అవకాశాలు ఉన్నాయని తెలుస్తోంది. ఈ షెడ్యూల్‌ కాకుండా మరో షెడ్యూల్‌ లో కూడా ప్రభాస్ పాల్గొంటాడా లేదా అనేది తెలియాల్సి ఉంది.

మరో వైపు ప్రభాస్ సలార్ 2 షూటింగ్‌ ప్రారంభం అయ్యింది. కల్కి సినిమా పోస్ట్‌ ప్రొడక్షన్ వర్క్‌ లో ఉంది. రాజాసాబ్‌ సినిమా షూటింగ్‌ సగానికి పైగా పూర్తి అయ్యింది. ఇక స్పిరిట్‌ మరియు హనురాఘవపూడి దర్శకత్వంలో సినిమా లు చర్చల దశలో ఉన్నాయి. ఇన్ని సినిమాలు ఉండగా కన్నప్పలో ఏరి కోరి ఆ గెస్ట్‌ రోల్‌ చేయడం వెనుక ఉద్దేశ్యం ఏంటి ప్రభాస్‌ అంటూ ఫ్యాన్స్‌ సోషల్‌ మీడియా ద్వారా ప్రశ్నిస్తున్నారు.