సారీ చెప్పినా వ‌ద‌ల్లేదు..ముందస్తు బెయిల్ కోసం నటి ప్ర‌య‌త్నాలు!
తప్పుగా మాట్లాడాన‌ని క్ష‌మించాల‌ని కోరినా క‌స్తూరిపై తెలుగు ప్రజలు సీరియ‌స్ గా ఉన్నారు.
త‌మిళ, తెలుగు భాషల్లో పాపుల‌రైన సినీన‌టి కస్తూరి శంకర్ ఇటీవ‌ల ఓ వివాదంలో చిక్కుకున్న సంగ‌తి తెలిసిందే. తమిళనాడులో నివసిస్తున్న తెలుగు మాట్లాడే వారిపై అభ్యంతరకర వ్యాఖ్యలు చేసినందుకు మధురై పోలీసులు తనపై పెట్టిన కేసు విచార‌ణ‌లో ఉంది. మధురై , చెన్నైలో ప్రజల నుండి ప‌లు ఫిర్యాదులు వెల్లువెత్త‌డంతో పోలీసులు ఈ విషయంపై దర్యాప్తు కొనసాగించారు. తప్పుగా మాట్లాడాన‌ని క్ష‌మించాల‌ని కోరినా క‌స్తూరిపై తెలుగు ప్రజలు సీరియ‌స్ గా ఉన్నారు. దీంతో కస్తూరి మద్రాస్ హైకోర్టులో ముందస్తు బెయిల్ పిటిషన్‌ను సమర్పించారు.
నటి కస్తూరి శంకర్ దాఖలు చేసిన ముందస్తు బెయిల్ పిటిషన్‌పై మద్రాస్ హైకోర్టు మధురై బెంచ్‌ ఉత్తర్వులను రిజర్వ్‌ చేసింది. మంగళవారం కేసు విచారణ సందర్భంగా జస్టిస్ ఆనంద్ వెంకటేష్, కస్తూరి ఇలాంటి వివాదాస్పద వ్యాఖ్యలు చేయడం సరికాదని వ్యాఖ్యానించారు. మద్రాస్ ప్రెసిడెన్సీ కాలం నుండి తెలుగు మాట్లాడే ప్రజలు తమిళనాడులో నివసిస్తున్నారని, వారు ఈ భూమిలో ఒక భాగం అని జస్టిస్ వెంకటేష్ గుర్తించారు.
కస్తూరి తరపు న్యాయవాది తన వ్యాఖ్యలకు క్షమాపణలు చెప్పారని, దాని గురించి వివరణ ఇచ్చారని, ముఖ్యంగా తెలుగు మాట్లాడే మహిళల గురించి ఆమె తప్పుగా ఏదీ చెప్పలేదని ఆమె వాదించారు. ఈ కేసులో నవంబర్ 14న ఉత్తర్వులు వెలువడనున్నాయి.
తెలుగు సంఘం ఇచ్చిన ఫిర్యాదు మేరకు చెన్నైలోని పోలీసులు నటి క‌స్తూరిపై భారత్ నాగ‌రిక్ సురక్షా సంహితలోని నాలుగు సెక్షన్ల కింద కేసు నమోదు చేశారు. తెలుగు సమాజం మనోభావాలను దెబ్బతీసినందుకు ఆమెపై పోలీసులకు ఫిర్యాదు చేయడంతో కస్తూరి కనిపించకుండా పోయారు. ఆమె ఇంటికి తాళం వేసి ఉంద‌ని పోలీసులు గుర్తించ‌డంతో, ముందస్తు బెయిల్ కోసం త‌ప్పించుకుని తిరుగుతున్నార‌ని పోలీసులు వ్యాఖ్యానించారు.
శంకర్ ద‌ర్శ‌క‌త్వంలో తెర‌కెక్కిన బ్లాక్ బ‌స్ట‌ర్ చిత్రం భార‌తీయుడులో కస్తూరి న‌టించారు. ప‌లు త‌మిళం, తెలుగు చిత్రాల్లో న‌టించిన సీనియ‌ర్ న‌టీమ‌ణిగా సుప‌రిచితురాలు. తెలుగులో `ఇంటింటి గృహ‌ల‌క్ష్మి` సీరియ‌ల్ తోను మంచి పేరు తెచ్చుకున్నారు. ఇటీవ‌ల సోష‌ల్ మీడియాల్లో కస్తూరి రాజ‌కీయాలు, సినిమాల‌పై తన గొంతును బ‌లంగా వినిపిస్తున్నారు. అయితే తెలుగు వారిపై తాజాగా కస్తూరి చేసిన వ్యాఖ్య విస్పోట‌నంగా మారింది.