వైజాగ్‌లో చరిత్ర సృష్టించిన పుష్పరాజ్‌!

అల్లు అర్జున్‌ కెరీర్‌ పుష్పకి ముందు పుష్ప తర్వాత అన్నట్లుగా మారిపోయింది. మొదటి పార్ట్‌ పాన్‌ ఇండియా రేంజ్‌లో దాదాపుగా రూ.400 కోట్ల వసూళ్లు నమోదు చేసింది. పుష్ప 2 బాక్సాఫీస్‌ వద్ద ఏకంగా రూ.2000 కోట్ల వసూళ్లు నమోదు చేసే అవకాశాలు ఉన్నాయంటూ అంతా చాలా నమ్మకంగా ఉన్నారు. వెయ్యి కోట్లకు పైగా ప్రీ రిలీజ్ బిజినెస్ చేసిన ఈ సినిమా గత కొన్ని సంవత్సరాలుగా ఎవరూ టచ్‌ చేయలేక పోతున్న రికార్డులను బ్రేక్ చేసే అవకాశాలు పుష్కలంగా కనిపిస్తున్నాయి. డిసెంబర్‌ 5న విడుదల కాబోతున్న సినిమా అప్పుడే రికార్డుల వేట మొదలు పెట్టింది. తాజాగా వైజాగ్‌లో సంచలన రికార్డ్‌ నమోదు అయింది.

ఇప్పటి వరకు తెలుగు సినిమా చరిత్రలో ఏ హీరోకు దక్కని భారీ కటౌట్‌ గౌరవం పుష్పరాజ్‌కి దక్కింది. విశాఖపట్నంలోని సంగం శరత్‌ థియేటర్‌లో ఏకంగా ర108 అడుగుల ఎత్తు, 16 అడుగుల వెడల్పు ఉన్న కటౌట్‌ను ఏర్పాటు చేయడం జరిగింది. ఆ కటౌట్‌ ప్రస్తుతం టాక్‌ ఆఫ్‌ ది ఇండస్ట్రీగా నిలిచింది. ఏపీలో ఇప్పటి వరకు ఈ స్థాయి కటౌట్‌ ఏ సినిమాకు, ఏ హీరోకు పెట్టలేదు. అందుకే ఫ్యాన్స్‌తో పాటు ప్రతి ఒక్కరు ఈ కటౌట్‌ గురించి మాట్లాడుకుంటూ ఉన్నారు. సినిమా విడుదలకు ఇంకా పది రోజుల సమయం మిగిలి ఉంది. ఈ నేపథ్యంలో మేకర్స్‌ సినిమా ప్రమోషన్‌ను భారీ ఎత్తున ప్లాన్‌ చేస్తున్నారు.

ఫ్యాన్స్ ఈ కటౌట్‌ను భారీగా ఏర్పాటు చేయడం కోసం దాదాపు నెల రోజులుగా వర్క్ జరుగుతుందట. అత్యంత పెద్ద కటౌట్‌ను ఏర్పాటు చేయాలి అనే ఉద్దేశ్యంతో ఫ్యాన్స్‌ ఈ కటౌట్‌ ఏర్పాటు చేయడం జరిగింది. తెలుగు సినిమా చరిత్రలో నిలిచి పోయే విధంగా ఈ కటౌట్‌ ఉందంటూ ఫ్యాన్స్‌తో పాటు ప్రతి ఒక్కరు అంటున్నారు. జాతీయ అవార్డును సొంతం చేసుకున్న అల్లు అర్జున్‌కి ఇది వైజాగ్‌ తరపున ఇస్తున్న గిఫ్ట్‌ అంటూ అభిమానులు అభిప్రాయం వ్యక్తం చేస్తున్నారు. కటౌట్‌ కి మంచి స్పందన రావడంతో పాటు సినిమాపై అంచనాలు భారీగా పెరుగుతున్నాయి.

అల్లు అర్జున్‌ హీరోగా సుకుమార్‌ దర్శకత్వంలో రష్మిక మందన్న హీరోయిన్‌గా నటించిన పుష్ప 2 సినిమా బాక్సాఫీస్ వద్ద భారీ విజయాన్ని సొంతం చేసుకోవడం ఖాయం అంటూ ప్రతి ఒక్కరు చాలా నమ్మకంతో ఉన్నారు. రికార్డ్‌ బ్రేకింగ్‌ వసూళ్లు ఈ సినిమా సాధిస్తుంది అనే నమ్మకంను సైతం ఎంతో మంది వ్యక్తం చేస్తున్నారు. శ్రీలీల నటించిన కిస్సిక్‌ ఐటెం సాంగ్‌కి మంచి స్పందన వచ్చింది. సినిమాలోని ప్రతి పాట ది బెస్ట్‌ అన్నట్లుగా ఉంది అని అభిమానులు అభిప్రాయం వ్యక్తం చేస్తున్నారు. రీ రికార్డింగ్‌ కోసం తమన్‌ను రంగంలోకి దించారని తెలుస్తోంది. ఒకటి రెండు రోజుల్లో సినిమా షూటింగ్‌ పూర్తి అవుతుందని అంటున్నారు. బన్నీ లేని కొన్ని సన్నివేశాల చిత్రీకరణ జరుపుతున్నారట. మరో వైపు పోస్ట్‌ ప్రొడక్షన్ వర్క్‌ సైతం జరుగుతూనే ఉంది.