సలార్ ఎఫెక్ట్.. కొత్త సినిమాల రిలీజ్ డేట్స్ ఇవే!

'సలార్' సెప్టెంబర్ 28 నుంచి వాయిదా పడడంతో, ఇండస్ట్రీలో ఇతర సినిమాల రిలీజ్ డేట్స్ అన్నీ తారుమరైపోయాయి. అన్నీ చిత్రాలు తమ విడుదల తేదిల్ని మార్చుకుని కొత్త డేట్ ను ఖరారు చేసుకునేందుకు కిందామీద పడుతున్నాయి. అయితే ముఖ్యంగా సెప్టెంబర్ 28 డేట్ కోసం పోటీ ఎక్కువైపోయింది. ఇప్పటికే కొన్ని చిత్రాలు ఆ తేదీపై కర్చీఫ్స్ వేసి బెర్త్ లు ఖరారు చేసుకోగా, మరికొన్ని సినిమాలు ఆ రిలీజ్ డేట్ ను ఖరారు చేసుకునేందుకు రెడీ అవుతున్నాయి.

ముఖ్యంగా సెప్టెంబర్ 15న విడుదల తేదీని ఫిక్స్ చేసుకున్న సినిమాలు సెప్టెంబర్ లాస్ట్ వీకెండ్ కు వెళ్లిపోతున్నాయి. దీంతో సెప్టెంబర్ 28న బాక్సాఫీస్ ముందు పోటీ రసవత్తరంగా మారుతోంది. చిన్న పెద్ద సినిమాలు వచ్చేందుకు రెడీ అయిపోయాయి. దీంతో మళ్లీ కొన్ని చిన్న సినిమాలు.. ఈ పోటీ వల్ల తమపై పడే ప్రభావం నుంచి తప్పించుకునేందుకు.. సెప్టెంబర్ 28 రేసు నుంచి కూడా తప్పుకోవడం ప్రారంభించాయి.

ఇప్పటికే సితార్ ఎంటర్ టైన్మెంట్స్ నిర్మించిన ఎన్టీఆర్ బావమరిది నటించి మ్యాడ్ చిత్రం రిలీజ్ డేట్ ను మార్చుకుంది. అలాగే యంగ్ హీరో కిరణ్ అబ్బవరం రూల్స్ రంజన్ కూడా పోస్ పోన్ చేసుకుని అక్టోబర్ 6కు వెళ్లిపోయింది. దీంతో ప్రస్తుతం సెప్టెంబర్ 28, 29న శ్రీకాంత్ అడ్డాల పెద్దకాపు 1, బోయపాటి-రామ్ పోతినేని స్కంద ప్రేక్షకుల్ని అలరించేందుకు సిద్ధంగా ఉన్నాయి. అలాగే 28వ తేదీన లారెన్స్ చంద్రముఖి 2, 28న వ్యాక్సిన్ వార్ చిత్రాలు ఉన్నాయి.

ఇక సెప్టెంబర్ 15న రావాల్సిన చిత్రాలు సెప్టెంబర్ లాస్ట్ వీకెండ్ కు వెళ్లడంతో.. మరి కొన్ని చిత్రాలేమో తెలివిగా పెద్దగా పోటీలేని సెప్టెంబర్ 15న ఖాయం చేసుకుంటున్నాయి. రవితేజ నిర్మించిన ఛాంగురే బంగారురాజా, విశాల్ మార్క్ ఆంటోని, రామన్న యూత్, సోదరా సోదరిమణులారా వంటి చిత్రాలు రానున్నాయి. వీటిలో మార్క్ ఆంటోని ఒక్కటే పెద్ద సినిమా.

ఇక రూల్స్ రంజన్ కొత్త విడుదల తేదీ అయిన అక్టోబర్ 6న మామ మచీంద్ర, మంత్ ఆఫ్ మధు, ది ఎక్సోరిస్ట్ బిలీవర్ ఈజ్ కమింగ్ విడుదల కానున్నాయి. ఇదే అక్టోబర్ నెలలో బడా చిత్రాలు కూడా రానున్నాయి. 19న బాలకృష్ణ భగవంత్ కేసరి, దళపతి విజయ్ లియో, ఘోస్ట్ ఆడియెన్స్ ను అలరించనుండగా.. 20వ తేదీన రవితేజ నటించిన పాన్ ఇండియా టైగర్ నాగేశ్వరరావు విడుదల కానుంది. నిజానికి టైగర్ నాగేశ్వరరావు కూడా సెప్టెంబర్ 28న కన్నేసింది కానీ అక్కడ కూడా పోటీ ఎక్కువ ఉండడంతో మళ్లీ అక్టోబర్ 20కే రెడీ అయిపోయింది.