'ర‌జ‌నీ-క‌మల్ హాస‌న్-సూర్య' మ‌ల్టీస్టార‌ర్

సూప‌ర్‌స్టార్ ర‌జ‌నీకాంత్ .. విశ్వ‌న‌టుడు క‌మ‌ల్ హాస‌న్.. సింగం సూర్య .. ఈ ముగ్గురి క‌ల‌యిక‌లో ఓ సినిమా తెర‌కెక్కితే ఎలా ఉంటుంది?.. అభిమానుల‌ ఊహ‌కే వ‌దిలేయాలి. అది నిజానికి తెర‌పై క‌న్నుల పండుగ‌ను త‌ల‌పిస్తుంది. ముగ్గురు దిగ్గ‌జ న‌టులు ఒక‌రితో ఒక‌రు పోటీప‌డుతూ నువ్వా నేనా? అంటూ న‌టిస్తుంటే చూసేందుకు ఫ్యాన్స్ కి రెండు క‌ళ్లు చాల‌వు.

అయితే ఈ మెగా మ‌ల్టీస్టార‌ర్ కి ఆస్కారం ఉందా? అంటే ఉండాల‌ని కోరుకుంటున్నాన‌ని సూర్య‌ అన్నారు. ర‌జ‌నీకాంత్, క‌మ‌ల్ హాస‌న్ ల‌తో న‌టించే అవ‌కాశం వ‌స్తే... ఎవ‌రితో న‌టిస్తారు? అని ప్ర‌శ్నించ‌గా, దానికి సూర్య ఆస‌క్తిక‌ర స‌మాధానం చెప్పారు. ``ఆ ఇద్ద‌రికీ నేను వీరాభిమానిని. 1975లో ర‌జ‌నీ స‌ర్ న‌టుడిగా కెరీర్ ప్రారంభించారు. నేను ఆ సంవ‌త్స‌రంలోనే పుట్టాను. క‌మ‌ల్ హాస‌న్ నుంచి ఎన్నో విష‌యాలు నేర్చుకున్నాను. మేం ముగ్గురం క‌లిసి మ‌ల్టీస్టార‌ర్ చేస్తే ఎంతో బావుంటుంద‌ని అనుకుంటున్నాను..`` అని అన్నారు.

రాజ‌మౌళి-సుకుమార్- సందీప్ రెడ్డి వంగా.. ఈ ముగ్గురిలో మ‌ల్టీస్టారర్ కి ఎవ‌రు ద‌ర్శ‌క‌త్వం వ‌హిస్తే బావుంటుంది? అని ప్ర‌శ్నించ‌గా.. ఆ ముగ్గురితో సినిమాలు చేయాల‌నుంద‌ని అన్నారు. ర‌జనీ-క‌మ‌ల్ తో త‌న మ‌ల్టీస్టార‌ర్ ని మూడు భాగాలుగా ముగ్గురూ తెర‌కెక్కిస్తే బావుంటుంద‌ని అభిప్రాయ‌ప‌డ్డారు. సూర్య న‌టించిన భారీ పాన్ ఇండియ‌న్ చిత్రం `కంగువ` విడుద‌ల‌కు సిద్ధ‌మ‌వుతున్న సంగ‌తి తెలిసిందే.