ఎట్ట‌కేల‌కు పెళ్లిలో దేవుడు ప్ర‌త్య‌క్ష‌మ‌య్యాడు!

వరుణ్ తేజ్- లావణ్య త్రిపాఠి ఓ ఇంటి వార‌య్యారు. పెళ్లి వేడుక క‌న్నుల‌పండుగ‌గా సాగింది. నవంబర్ 1న ఇటలీలోని టుస్కానీలో ఈ జంట‌ వివాహం హల్దీ వేడుకతో చాలా ఉత్సాహంగా ప్రారంభమయ్యాయి. తర్వాత మెహందీ వేడుక జ‌రిగింది. అటుపై కాక్ టెయిల్ పార్టీని నిర్వహించారు. వేడుకల నుండి అద్భుతమైన ఫోటోలు సోషల్ మీడియాలో షికార్ చేస్తున్నాయి. అభిమానుల నుండి ఈ ప్రేమ జంట‌కు శుభాకాంక్షలు వెల్లువెత్తాయి. వరుణ్ - లావణ్యల పెళ్లి వేడుక‌లో మెగాస్టార్ చిరంజీవితో పాటు అల్లు అర్జున్, రామ్ చరణ్, సాయిధ‌ర‌మ్, అల్లు శిరీష్ త‌దిత‌రులు ఉన్నారు.

అయితే ఈ వేడుక ఆద్యంతం మెగా- అల్లు హీరోలు సంద‌డి చేసినా కానీ ప‌వ‌ర్ స్టార్ ప‌వ‌న్ క‌ల్యాణ్ ఎక్క‌డా ఫోటోల్లో క‌నిపించ‌క‌పోవ‌డంతో ర‌క‌ర‌కాల సందేహాలు వ్య‌క్త‌మ‌య్యాయి. చాలా ఫోటోల్లో చిరంజీవి, చ‌ర‌ణ్‌, బ‌న్ని క‌నిపించారు కానీ ప‌వ‌న్ క‌నిపించ‌లేదు. అయితే ప‌వ‌న్ ఇంత‌కుముందు ఈ పెళ్లి కోసం త‌న భార్య అన్నా లెజినోవాతో క‌లిసి బ‌య‌ల్దేరిన‌ప్ప‌టి ఫోటోలు వైర‌ల్ అయ్యాయి. కానీ పెళ్లిలో ఎక్క‌డా ఈ జంట సంద‌డి కనిపించ‌లేదు.

కానీ ఇప్పుడు ఒకే ఒక్క ఫోటో బ‌య‌ట‌ప‌డింది. ఈ ఫోటోగ్రాఫ్ లో బంధువుల‌తో పాటు ప‌వ‌న్ క‌ల్యాణ్ క‌నిపించారు. అది కూడా చాలా క్యాజువ‌ల్ గా ఎలాంటి హంగామా లేకుండా క‌నిపించారు. ప‌వ‌న్ ఈ ఫోటోగ్రాఫ్ లో చాలా సింపుల్ గా టీష‌ర్ట్ తో కనిపించ‌డంతో ప్రీవెడ్డింగ్ వేడుక‌ల్లో ఆయ‌న ఇలా క‌నిపించార‌ని భావిస్తున్నారు. అయితే పెళ్లి వేడుక‌కు సంబంధించిన పూర్తి ఫోటోలేవీ ఇప్ప‌టివ‌ర‌కూ విడుద‌ల కాలేదు. అలాగే వ‌ధూవ‌రుల‌తో మెగా బ్ర‌ద‌ర్స్ అంతా క‌లిసి ఉన్న ఫోటోగ్రాఫ్ లోను ప‌వ‌న్ ఇదే టీష‌ర్ట్ తో క‌నిపించారు. మెగా హీరోలంతా ఒకే వేదిక‌పైకి వ‌చ్చిన‌ప్ప‌టి ఈ ఫోటోగ్రాఫ్ ఎంతో ప్ర‌త్యేకంగా క‌నిపిస్తోంది. ప‌వ‌ర్ స్టార్ ప‌వ‌న్ క‌ల్యాణ్ ఈ వేడుక నుంచి తిరిగి వ‌చ్చాక త‌దుప‌రి షూటింగ్ షెడ్యూళ్ల‌పై దృష్టి సారిస్తార‌ని తెలుస్తోంది.