వెంకీ మామ.. టాలీవుడ్ చరిత్రలో ఆయనే ఫస్ట్!

టాలీవుడ్ స్టార్ హీరో విక్టరీ వెంకటేష్ రీసెంట్ గా సంక్రాంతికి వస్తున్నాం మూవీతో ప్రేక్షకుల ముందుకు వచ్చిన విషయం తెలిసిందే. అనిల్ రావిపూడి దర్శకత్వం వహించిన ఆ సినిమా సూపర్ హిట్ గా నిలిచింది. అనిల్, వెంకీ కాంబోలో ఇప్పటికే వచ్చిన ఎఫ్-2, ఎఫ్-3 మంచి హిట్స్ గా నిలిచాయి. ఇప్పుడు సంక్రాంతికి వస్తున్నాం అంతకుమించిన విజయం సాధించింది.

మూవీలో ఐశ్వర్య రాజేష్, మీనాక్షి చౌదరీ హీరోయిన్లుగా నటించగా.. బుల్లి రాజు రోల్ లో కనిపించిన రేవంత్ మెయిన్ అట్రాక్షన్ గా నిలిచాడు. ఓవరాల్ గా మూవీ ఔట్ అండ్ ఔట్ కామెడీతో అందరినీ ఆకట్టుకుంది. సంక్రాంతికి సరైన మూవీ అనిపించుకుంది. తద్వారా వెంకటేష్ మంచి కమ్ బ్యాక్ ఇచ్చారు. ఫ్యామిలీ ఆడియన్స్ ను మెప్పించి సూపర్ హిట్ ను సొంతం చేసుకున్నారు.

అదే సమయంలో సంక్రాంతికి వస్తున్నాం మూవీతో టాలీవుడ్ సినీ ఇండస్ట్రీ కొత్త చరిత్ర లిఖించేందుకు సిద్ధమవుతున్నారు వెంకటేష్. రూ.300 కోట్ల క్లబ్ లో చేరనున్న తొలి తెలుగు సీనియర్ హీరోగా నిలవనున్నారు. దీంతో ఆయన కెరీర్ లో సంక్రాంతికి వస్తున్నాం సినిమా.. అరుదైన మైలురాయిగా నిలవనుందనే చెప్పాలి. ప్రస్తుతం ఆయన ఫ్యాన్స్.. ఫుల్ హ్యాపీగా ఫీలవుతున్నారు.

అయితే ఇప్పటికే బాక్సాఫీస్ వద్ద రికార్డులను బద్దలు కొట్టిన సంక్రాంతికి వస్తున్నాం మూవీ రూ.300 కోట్ల క్లబ్‌ లోకి ప్రవేశించే దిశగా దూసుకుపోతోంది.

అంతే కాకుండా రూ.300 కోట్ల మార్కును దాటిన మొదటి ప్రాంతీయ తెలుగు చిత్రంగా రికార్డు సృష్టించనుంది. ఓవర్సీస్ లో కూడా మంచి వసూళ్లు రాబడుతోంది. ఇప్పటికే మూడు మిలియన్ల మార్కును చేరుకుంది.

వరల్డ్ వైడ్ గా ఇప్పటి వరకు రూ.290 కోట్లకు పైగా సంక్రాంతికి వస్తున్నాం మూవీ రాబట్టినట్లు తెలుస్తోంది. రాబోయే వీకెండ్ లో సినిమా రూ.300 కోట్ల క్లబ్ లో అడుగుపెడుతుందని అంతా అంచనా వేస్తున్నారు.. ఎందుకంటే వీకెండ్ లో మరే ఇతర సినిమా పోటీ లేకపోవడంతో మంచి వసూళ్లు రాబట్టే అవకాశం ఉందని ట్రేడ్ పండితులు చెబుతున్నారు.

అయితే రూ.45 కోట్ల ప్రీ రిలీజ్ బిజినెస్‌ చేసిన సంక్రాంతికి వస్తున్నాం మూవీ.. రూ.50 కోట్ల షేర్‌ టార్గెట్‌ తో విడుదల అయిందని సమాచారం. ఇప్పుడు ఏకంగా రూ.150 కోట్ల షేర్ రాబట్టినట్లు తెలుస్తోంది. దీంతో రూ.100 కోట్ల లాభాలు వచ్చినట్లు ఇండస్ట్రీలో ప్రచారం జరుగుతోంది. మొత్తానికి సంక్రాంతికి వస్తున్నాం మూవీతో వెంకటేష్.. తెలుగు ఇండస్ట్రీలో సరికొత్త చరిత్ర సృష్టించనున్నారన్న మాట.