అంబటి బాగా కెలుకుతున్నారా... ?

సినీ హీరో కం పొలిటీషియన్ అయిన పవన్ కళ్యాణ్ లేటెస్ట్ మూవీ బ్రో రిలీజ్ అయింది. థియేటర్లలో ఆడుతోంది. బ్రోలో ఒక చిన్న సన్నివేశంలో శ్యాంబాబు పాత్ర ఉంది. అది అంబటి రాంబాబుని పోలి ఉందని మొదటి రోజునే టాక్ స్ప్రెడ్ అయింది. దాని మీద అదే రోజున మంత్రి అంబటి రాంబాబు మీడియాతో మాట్లాడుతూ తన సైడ్ ఆగ్రహాన్ని వ్యక్తం చేశారు.

ఆ తరువాత ఈ వైపు నుంచి ఆ పాత్ర వేసిన సినీ నటుడు థర్టీ ఇయర్స్ ఇండస్ట్రీ పృధ్వీ రాజ్ కూడా కౌంటర్ ఇచ్చారు. అక్కడితో అది సరి అని అంతా అనుకున్నారు. నిజానికి సినిమాలో ఒక పాటలో అతి చిన్న బిట్ గా ఈ సీన్ వస్తుంది. జనాలు కూడా ఆ సీన్ చూసి అది అంబటి రాంబాబు ఈ ఏడాది సంక్రాంతికి చేసిన డ్యాన్స్ అని అనుకోరు. కానీ జనసేన వారు మొదటి రోజున దాని మీద సోషల్ మీడియాలో విస్తృతంగా ప్రచారం చేయడంతో కొంత ఆసక్తి ఏర్పడింది.

కానీ ఆ తరువాత అది సద్దుమణిగింది. కామన్ ఆడియన్ గా ఎవరైనా చేస్తే అది జస్ట్ బిట్ అని చూసి ఎంజాయ్ చేస్తారు అంతే. కానీ మంత్రి అంబటి రాంబాబు మాత్రం దాన్ని బాగా కెలుకుతున్నారు అంటున్నారు. తన మీద పాత్ర పెట్టి సినిమా తీస్తారా అని ఆయన మండిపడుతున్నారు. నిజానికి ఆయనకు బాధ ఉంటే ఎవరూ కాదనలేరు. కానీ ఆయన చెప్పాల్సింది చెప్పేశారు.

మళ్లీ మంగళవారం ఆయన మీడియా మీటింగ్ పెట్టి మరీ కేవలం బ్రో సినిమా గురించి పవన్ గురించి మాట్లాడడమే కాకుండా సినీ ఇండస్ట్రీకి ఒక మాదిరి వార్నింగ్ ఇవ్వడం మీద చర్చ సాగుతోంది. ఇంత అవసరమా అంబటి గారూ అని అంతా అనుకునేలా ఉంది. పవన్ కళ్యాణ్ మీద సినిమా తీస్తామని అంబటి అంటున్నారు.

ఆ సినిమాకు మూడు పెళ్ళిళ్ళు, పెళ్ళీ పెటాకులు, మ్రో, నిత్య పెళ్ళి కొడుకు అంటూ చాలా పేర్లను అంబటి చదివి వినిపించారు. నిజానికి పేరడీ అన్నది కూడా ఆర్ట్ లో ఒక కళ. అలా ఎన్నో పేరడీ మూవీస్ పాత్రలు దర్శకుడు ఆర్జీవీ క్రియేట్ చేశారు. వాటిని జస్ట్ ఎంజాయ్ చేస్తారు అంతే.

కానీ అంబటి మాత్రం సీరియస్ గా తీసుకుని ముందుకు వెళ్తున్నారు. ఆయన తీరు పట్ల మాత్రం జనసేన ఎటూ ఘాటుగానే రియాక్ట్ అవుతోంది. కానీ అంబటి అంతలా రియాక్ట్ ఎందుకు అవుతున్నారు అన్నదే చర్చకు వస్తోంది. ఆయన కీలకమైన జలవనరుల శాఖకు మంత్రిగా ఉన్నారు.

ప్రస్తుతం ఏపీలో వర్షాలు వరదల సీజన్ సాగుతోంది. ఆయన శాఖ అతి ముఖ్యమైన బాధ్యతలతో మునిగి తేలాల్సి ఉంది. అలాంటి చోట అంబటి సార్ ఇలా కేవలం ఒక సినిమా మీద విమర్శలు చేస్తూ పోవడం ఎంతవరకూ సమంజమసం సార్ అని అంటున్నారు. అంబటి కోరి కెలుక్కుంటున్నారా లేక తానే ఆ మూవీకి ఫ్రీ పబ్లిసిటీ తెచ్చిపెడుతున్నారా అన్న ప్రశ్నలు అయితే వస్తున్నాయి.