జిమ్ లో ఎమ్మెల్యే బాలయ్య కసరత్తులు.. ఫ్యాన్స్ కేరింతలు.. వీడియో!

నందమూరి నటసింహం, హ్యాట్రిక్ ఎమ్మెల్యే నందమూరి బాలకృష్ణకు సంబంధించిన ఏ విషయమైనా ఫ్యాన్స్ ను ఫుల్ ఖుషీ చేస్తుంటుంది. సినిమాల సంగతి కాసేపు పక్కనపెడితే.. హిందూపురం ఎమ్మెల్యేగా బాలయ్య తన నియోజకవర్గ ప్రజలకు రెగ్యులర్ గా టచ్ లో ఉండే ప్రయత్నం చేస్తుంటారు. వారందరి సమస్యలు తెలుసుకుంటూ, వారితో కలిసి సందడి చేస్తుంటారు.

ఈ సమయంలోనే తాజాగా శ్రీ సత్యసాయి జిల్లాలోని తన సొంత నియోజకవర్గం హిందూపురంలో బాలయ్య తాజాగా పర్యటించారు. ఈ సందర్భంగా పలు అభివృద్ధి కార్యక్రమాలు చేపట్టారు. ఇదే సమయంలో... తాజాగా ఓ జిమ్ ని ఎమ్మెల్యే బాలకృష్ణ ప్రారంభించారు. ఈ సందర్భంగా ఆ జిమ్ లో కాసేపు కసరత్తులు చేస్తూ సందడి చేశారు. ఈ సమయంలో ఆ పరిశరాలన్నీ జై బాలయ్య నినాదాలతో మారుమ్రోగిపోయాయి.

అవును... తాజాగా హిందూపురంలో పర్యటించిన బాలయ్య.. స్థానిక ప్రభుత్వాసుపత్రి ఆవరణంలో అన్న క్యాంటిన్ ను ప్రారంభించారు. ఈ కార్యక్రమలో బాలయ్యతో పాటు జిల్లా కలెక్టర్ చేతన్ పాల్గొన్నారు. ఇక్కడ అన్న క్యాంటీన్ ను ప్రారంభించిన అనంతరం అల్పాహారాన్ని స్వయంగా బాలయ్య వడ్డించారు.

ఈ సందర్భంగా స్పందించిన బాలయ్య... పేదలకు అన్న క్యాంటిన్ కడుపు నింపుతుందని.. అన్న క్యాంటీన్లు తిరిగి ప్రారంభమవ్వడం ఒక పండుగ లాంటిదని అన్నారు. పేదల ఆకలి తీర్చేందుకు అప్పట్లో ఎన్టీఆర్ రెండు రూపాయలకు కిలో బియ్యం ఇచ్చారని గుర్తు చేశారు. చంద్రబాబుకు హిందూపురం అంటే ప్రత్యేక అభిమానం ఉందని తెలిపారు.

అనంతరం సమీపంలో ఉన్న జిమ్ ను ప్రారంభించారు బాలకృష్ణ. ఈ సందర్భంగా వైట్ అండ్ వైట్ డ్రెస్ లో మెడలో పసుపు కండువా ధరించి కాసేపు కసరత్తులు చేశారు. దీంతో... "జై బాలయ్యా.. జై బాలయ్య" అంటూ అభిమానులు కేరింతలతో హోరెత్తించారు. దీనికి సంబంధించిన వీడియో ఇప్పుడు వైరల్ గా మారింది. నెట్టింట సందడి చేస్తుంది.