జగన్ కు కూటమి సర్కార్ న్యాయం చేయాలట.. నాగబాబు వ్యంగ్యాస్త్రాలు!

జనసేన నేత కొణిదెల నాగబాబు ‘ఎక్స్’ వేదికగా చేసే పోస్ట్ లు నెట్టింట తీవ్ర చర్చనీయాంశం అవుతుంటాయనే సంగతి తెలిసిందే. అందులో కొన్ని ప్రజలను ఆలోచింపజేసేవిగా ఉంటే.. మరికొన్ని మాత్రం బౌన్స్ బ్యాక్ అవుతుంటాయని అంటుంటారు. ఇక ప్రధానంగా వైసీపీ మీద, జగన్ పైనా చేసే కామెంట్లు వైరల్ గా మారుతుంటాయి. ఈ నేపథ్యంలో తాజాగా మరోసారి వ్యంగ్యాస్త్రాలు సంధించారు నాగబాబు.

అవును... వైఎస్సార్ కాంగ్రెస్ పార్టీ పైనా, ఆ పార్టీ అధినేత జగన్ పైనా జనసేన నేత నాగబాబు చేసే ట్వీట్లు, కామెంట్లు, నర్మగర్భంగా పెట్టే కొన్ని పోస్టులు సోషల్ మీడియాలో తెగ వైరల్ అవుతాయనే సంగతి తెలిసిందే. ఇక కూటమి అధికారంలోకి వచ్చిన తర్వాత కాస్త తగ్గినట్లే కనిపించినా.. ఈ మధ్య మళ్లీ మొదలుపెట్టినట్లున్నారు నాగబాబు. ఈ సందర్భంగా కోడి కత్తి కేసు ప్రస్థావన తెరపైకి తెచ్చారు నాగబాబు.

ఈ సందర్భంగా ట్వీట్ చేసిన ఆయన... జగన్ నిన్నమొన్నటివరకు ముఖ్యమంత్రిగా బిజీగా ఉండటం వల్ల ఈ కోడి కత్తి కేసుపై పూర్తిగా కాన్ సంట్రేషన్ చేయలేదన్నట్లుగా మొదలుపెట్టిన నాగబాబు... ఇప్పుడు జగన్ ఫుల్ ఫ్రీ అన్నట్లుగా వెటకారమాడారు! ఈ సందర్భంగా జగన్ కు కూటమి ప్రభుత్వం న్యాయం చేయాలంటూ చంద్రబాబు, పవన్ కల్యాణ్, వంగలపూడి అనితలను కోరారు.

"2019కి ముందు అప్పటి ఎమ్మెల్యేగా ఉండి, తదనంతరం ఆంధ్రప్రదేశ్ రాష్ట్రానికి ముఖ్యమంత్రిగా మారి, ప్రస్తుతం పులివెందుల ఎమ్మెల్యేగా మిగిలినటువంటి జగన్ మోహన్ రెడ్డికి కూటమి ప్రభుత్వం న్యాయం చేయాలి" అంటూ మొదలుపెట్టిన నాగబాబు... "ఎందుకంటే.. 2019లో శ్రీను అనే వ్యక్తి ఆయనపై కోడికత్తితో దాడి చేశాడు. 5 ఏళ్లు అయినా కూడా ఆ కేసు ఇంకా కొలిక్కి రాలేదు" అందుకని అని చెప్పారు.

అయితే... "అప్పుడంటే జగన్ మోహన్ రెడ్డికున్న బిజీ షెడ్యూల్ వల్ల ఆయనకు కుదరలేదు.. కానీ, ఇప్పుడు ఆయన ఖాళీగానే ఉన్నారు. అందువల్ల కూటమి ప్రభుత్వం ఆయనకు న్యాయం చేయాల్సిన అవసరం అత్యవసరంగా ఉంది" అని చెబుతూ... "అతని మీద హత్యాయత్నం చేసిన నేరస్థుడికి సరైన శిక్ష విధించాలి కదా!" అని అన్నారు.

అందువల్ల ఆయన కోడికత్తి కేసుని తక్షణమే విచారించి, అమాయకుడైనటువంటి జగన్ ని న్యాయం చేయాల్సిందిగా కూటమి ప్రభుత్వాన్ని, ముఖ్యమంత్రి, డిప్యూటీ సీఎం, రాష్ట్ర హోం మంత్రిని కోరుకుంటున్నట్లు నాగబాబు ఎక్స్ లో పోస్ట్ పెట్టారు. దీంతో... ప్రస్తుతం ఈ పోస్ట్ కింద కామెంట్లు హల్ చల్ చేస్తున్నాయి. నాగబాబు ర్యాగింగ్ అలా ఉందంటూ స్పందిస్తున్నారు నెటిజన్లు!