విశాఖలో స్కూల్‌ ఆటో-లారీ ఢీ... 8 మంది చిన్నారులకు తీవ్ర గాయాలు!

రోడ్డు ప్రయాణాల విషయంలో పూర్తి సృహలో, పూర్తి జాగ్రత్తతో ఉండని పక్షంలో జరిగే ప్రమాదాలు పూడ్చలేని నష్టాన్ని మిగులుస్తాయనేది తెలిసిన విషయమే. మరి ముఖ్యంగా స్కూల్ పిల్లలను తీసుకునివెళ్లే మినీ బస్సులు, ఆటోల విషయంలో మరింత జాగ్రత్తలు పాటించాలని చెబుతుంటారు. ఈ నేపథ్యంలో తాజాగా స్కూల్ ఆటో - లారీ ఢీకొన్నాయి.

అవును... విశాఖలోని సంగం శరత్‌ థియేటర్‌ సమీపంలో బుధవారం ఉదయం ఘోర రోడ్డు ప్రమాదం చోటుచేసుకుంది. ఇందులో భాగంగా స్కూల్‌ విద్యార్థులు ప్రయాణిస్తున్న ఆటో - లారీ ఢీకొట్టుకోవడంతో ప్రమాదం జరిగింది. ఈ ప్రమాదంలో పలువురు విద్యార్థులు తీవ్రంగా గాయపడ్డారు. ప్రమాదం జరిగిన వెంటనే రియాక్ట్ అయిన స్థానికులు ఆ స్కూలు పిల్లల్ని ఆస్పత్రికి తరలించారు.

ఈ ప్రమాదం జరిగిన వెంటనే లారీ డ్రైవర్‌ పరార్‌ అయిపోగా... స్థానికులు క్లీనర్‌ ను మాత్రం పట్టుకుని పోలీసులకు అప్పగించారు. ఈ ప్రమాదంలో గాయపడిన విద్యార్థులు.... హాసిని ప్రియా, వాణి జయ రమ్య, భవేష్‌, జీ.గాయత్రి, లక్ష్య, కుశాల్ కేజీ, చార్విక్‌, కేయూష్ లుగా చెబుతున్నారు. వీరంతా ప్రస్తుతం ఆస్పత్రిలో చికిత్స తీసుకుంటున్నారు!

ఈ ప్రమాదంపై ట్రాఫిక్‌ ఏసీపీ రాజీవ్‌ కుమార్‌ స్పందించారు. ఉదయం ఏడున్నర గంటల ప్రాంతంలో ఈ ప్రమాదం జరిగినట్లు తెలిపారు. ఆ ఆటోలో ఎనిమిది మంది పిల్లలు ఉన్నారని.. వారంతా బేతని స్కూల్‌ కు చెందిన వాళ్లని అన్నారు. ముఖ్యంగా... ఈ ప్రమాదం జరిగిన వెంటనే స్థానికులు స్పందించారని తెలిపారు. కేసు నమోదు చేసి దర్యాప్తు చేపట్టినట్ళు తెలిపారు.

ఇదే రోజు విశాఖలో మరో ఘటన చోటు చేసుకుంది. ఇది కూడా స్కూలు పిల్లలు ప్రయాణిస్తున్న ఆటో ప్రమాదం కావడం గమనార్హం. ఈ ఘటనలో మధురవాడ - నగరంపాలెం రోడ్డులో ఆటో బోల్తా పడి విద్యార్థులకు గాయాలయ్యాయి. మధురవాడ నుంచి వస్తున్న ఆటో అదుపుతప్పి బోల్తా పడింది. ఈ ప్రమాదం జరిగిన సమయంలో ఆ ఆటోలో ఎనిమిది మంది విద్యార్థులు ఉన్నారని తెలుస్తుంది. వారందరూ స్వల్పంగా గాయపడ్డారని సమాచారం!