పక్కా లోకల్ చంటిగాడు గుర్తుకొచ్చేలా ఆనందయ్య తాజా మాట

దేశ వ్యాప్తంగా హాట్ టాపిక్ గా మారిన ఆనందయ్య మందును ఎప్పటి నుంచి పంపిణీ చేస్తారన్న ప్రశ్న పలువురిని తొలిచేస్తోంది. నిపుణుల రిపోర్టు వచ్చే వరకు మందు తయారీని నిలిపివేసిన ప్రభుత్వం..తాజాగా మందును తయారు చేయిస్తోంది. దీనిపై ఎవరెన్ని మాటలు చెబుతున్నా.. సంబంధం లేని సమాచారాన్ని ప్రచారం చేస్తున్నా పట్టించుకోవటం లేదు. తాజాగా ఒక వీడియో సందేశాన్ని మీడియా వర్గాలకు ఆనందయ్య పంపారు. అందులో తన మందు  పంపిణీపై ఫుల్ క్లారిటీ ఇచ్చారు.

తాను మందు పంపిణీ చేయటం లేదంటూ సాగుతున్న ప్రచారంతో సంబంధం లేదని స్పష్టం చేశారు. కరోనాకు చెక్ పెట్టే గుణం ఉందని ప్రచారం జరుగుతున్న మందును సోమవారం నుంచి షురూ చేయనున్నట్లు చెప్పారు. అన్ని జిల్లాల కలెక్టర్లకు మందుల కిట్లు పంపిణీ చేస్తామన్నారు. అయితే.. తొలుత తన సొంత నియోజకవర్గమైన సర్వేపల్లి పరిధిలోని ప్రతి ఇంటికి మందును పంపిణీ చేసిన తర్వాత ఇతర ప్రాంతాలపైనా ఫోకస్ పెట్టాలన్న నిర్ణయాన్ని తీసుకున్నట్లు వెల్లడించారు.

ఈ మాటను వింటే.. పక్కా లోకల్ చంటిగాడు గుర్తుకు రావటం ఖాయం. తన మందును అవసరమైన వారికి అందించే కంటే కూడా.. ముందు తాను ఉండే ప్రాంతం మొత్తానికి పంపిణీ చేయటానికి ఆనందయ్య ఇస్తున్న ప్రాధాన్యత చూస్తే.. చంటిగాడు గుర్తుకు రావటం ఖాయం. తన మందుకు దేశ వ్యాప్తంగా డిమాండ్ ఉన్నప్పటికి తన ఊరికి.. తన నియోజకవర్గానికి ఇస్తున్న ప్రాధాన్యత పలువురిని ఆకర్షిస్తోంది. అంతేకాద.. మందు కోసం ఎవరూ నేరుగా కృష్ణపట్నం రావద్దని ఆయన స్పష్టం చేశారు. అధికార యంత్రాంగం ద్వారా ముందును అన్ని జిల్లాలకు పంపుతామని ఆయన స్పష్టం చేశారు. ఏమైనా ఆనందయ్య పక్కా లోకల్ చంటిగాడని చెప్పక తప్పదు.