సెక్స్‌ వర్కర్స్‌ పై కరోనా ప్రభావం ఎలా ఉంది?

వాళ్లు వీళ్లు అనే తేడా లేకుండా ప్రపంచంలోని ప్రతి కమ్యూనిటీపైన.. అన్ని వర్గాల వారిపైన.. అన్ని రకాల వ్యాపారాలపైన కరోనా ప్రభావం కనిపిస్తుంది. లాక్‌ డౌన్‌ కారణంగా లక్షల కోట్ల నష్టాలను చవిచూడాల్సిన పరిస్థితి. ఇక సామాన్య మద్యతరగతి వారి పరిస్థితి దారుణంగా తయారయ్యింది. ఫస్ట్‌ రాబోతున్న నేపథ్యంలో జీతాలు వస్తాయో రావో తెలియక రాక పోతే పరిస్థితి ఏంటో అర్థం కాక జనాలు తీవ్ర ఆందోళన వ్యక్తం చేస్తున్నారు. ఈ సమయంలోనే ముంబయి దిల్లీ ఇంకా కొన్ని రెడ్‌ లైట్‌ ఏరియాలకు చెందిన సెక్స్‌ వర్కర్స్‌ కూడా తీవ్ర ఇబ్బందులు ఎదుర్కొంటున్నారు.

ఒక జాతీయ మీడియా సంస్థ ఈ సమయంలో సెక్స్‌ వర్కర్స్‌ పరిస్థితి ఏంటీ అంటూ ఒక కథనంను ప్రచురించడం జరిగింది. ఆ మీడియా సంస్థ ప్రతినిధి పలు రెడ్‌ లైట్‌ ఏరియాల్లో పర్యటిస్తూ వేశ్యలతో మాట్లాడటం జరిగిందట. వారు తమ పరిస్థితిని వివరించిన సమయంలో అతడి కళ్లు చెమర్చినట్లుగా చెప్పుకొచ్చాడు. విటులు లేకపోవడంతో రోజు రోజు వచ్చే డబ్బుతో జీవితం సాగించే మా పరిస్థితి దారుణంగా తయారయ్యిందని ఒక వేశ్య చెప్పిందట.

గత రెండు వారాలుగా పూర్తిగా విటుల సంఖ్య తగ్గిపోయిందని.. ఒక్కరు ఇద్దరు వచ్చినా కూడా వారి ద్వారా ఎక్కడ కరోనా వైరస్‌ వస్తుందేమో అనే భయం మాలో కలుగుతుందని ఒక సెక్స్‌ వర్కర్‌ అన్నారు. చిన్న పిల్లలు ఉన్న వారు కనీసం వారి పిల్లలకు పాలు పట్టలేని పరిస్థితి ఉందని ఒక వేశ్య చెప్పుకొచ్చింది. కొందరు ప్రస్తుతంకు ఉన్న డబ్బుతో నెట్టుకు వస్తున్నారని ఈ పరిస్థితి ఇలాగే ఇంకొన్నాళ్లు సాగితే అంతా రోడ్డున పడే పరిస్థితే వస్తుందని ఒక వేశ్య చెప్పుకొచ్చింది. మొత్తానికి సెక్స్‌ వర్కర్ల జీవితాలను కూడా కరోనా తీవ్రంగా ప్రభావితం చేస్తుందని ఆ కథనంలో పేర్కొనడం జరిగింది.