దాసరి మరణంపై అనుమానాలా?

ఓవైపు దర్శకరత్న దాసరి నారాయణరావు మృతిపై సినీ జనాలతో పాటు ఆయన అభిమానులందరూ శోకసంద్రంలో ఉంటే.. మరోవైపు ఆయన కుటుంబంలోని అంతర్గత కలహాలు ఇదే సమయంలో బయటికి రావడం ఆశ్చర్యం కలిగిస్తోంది. దాసరి చనిపోయిన కొన్ని గంటల్లోనే ఆయన పెద్ద కోడలు సుశీల మీడియా ముందుకొచ్చి సంచలన వ్యాఖ్యలు చేసింది. దాసరి మరణంపై అనుమానాలున్నట్లు ఆమె ఆరోపించడం గమనార్హం. తన మామ తనకు అన్యాయం చేసి వెళ్లిపోయారని ఆమె అంటోంది. తమ కుటుంబంలో ఇంకా ఆస్తి పంపకాలు జరగలేదని.. తనకు అంతా సెటిల్ చేస్తానని చెప్పిన దాసరి అంతలోనే మృతి చెందారని ఆమె ఆవేదన వ్యక్తం చేసింది.

దాసరి పెద్ద కొడుకు తారక ప్రభు భార్య అయిన సుశీల.. కొన్నేళ్లుగా ఆ కుటుంబానికి దూరంగా ఉంటోంది. పదేళ్ల కిందటే ఆమె భర్తపై వరకట్న వేధింపుల కేసు పెట్టింది. తర్వాత ఆ కేసు ఏమైందో కానీ.. కొడుకు (పేరు దాసరి నారాయణరావు)తో కలిసి ఆమె వేరుగా ఉంటోంది. మే 4న దాసరిని కలిశానని.. ఈ సందర్భంగా ఆస్తి పంపకాల గురించి అడగ్గా.. రెండు వారాల్లో తనకు సర్జరీ జరుగుతుందని.. అదయ్యాక అంతా సెటిల్ చేస్తానని దాసరి అన్నాడని సుశీల చెప్పింది. తన కొడుకు భవిష్యత్తు గురించి కూడా ఆయనతో మాట్లాడానని... ఎంతోమందికి సినీ రంగంలో జీవితాన్నిచ్చిన తాను.. తన మనవడిని పట్టించుకోనా అన్నారని.. కానీ ఇంతలోనే ఆయన తనకు న్యాయం చేయకుండానే వెళ్లిపోయారని ఆమె అంది. తాను ఆసుపత్రిలో దాసరిని చూడ్డానికి వెళ్తే.. లోపలికి వెళ్లకుండా అడ్డుకున్నారని.. అందుకే ఆయన మరణంపై తనకు అనుమానాలున్నాయని ఆమె ఆరోపించింది. సుశీల ఆరోపణలపై దాసరి కుటుంబ సభ్యులు ఏమంటారో చూడాలి.

Full View


Like Us on Facebook : https://www.facebook.com/Tupakidotcom/