కాసులు కురిపిస్తున్న కారు నెంబర్లు.. '1' కంటే '9'కే ఓటు!

కారుకు ఎంతటి ప్రాధాన్యత ఇస్తారో.. దానికి ఉండే నెంబరుకు అంతే ప్రాధాన్యత ఇచ్చేటోళ్లు చాలామందే కనిపిస్తారు. కొందరైతే నెంబరు కోసం లక్షలాది రూపాయిలు ఖర్చు చేయటానికి కూడా వెనుకాడరు. తెలుగు రాష్ట్రాల్లోని మిగిలిన ప్రాంతాలతో పోలిస్తే.. హైదరాబాద్ మహానగరంలో ఈ జోరు ఎక్కువగా ఉంటుంది. తాజాగా జరిగిన వేలంలో పలికిన ధరల్ని చూస్తే..కారు నెంబరుకు మంచి కారు వచ్చే పరిస్థితి ఉండటం విశేషం.

ఫ్యాన్సీ నెంబర్లను కార్లకు పెట్టుకోవటానికి చాలామంది ప్రాధాన్యత ఇస్తారు. మరికొందరు తాము సెంటిమెంట్ గా భావించే నెంబరు కోసం ఎంతకైనా సిద్ధమన్నట్లుగా ఉంటారు. అలాంటి కోవలోకే వస్తుంది తాజాగా జరిగిన వేలం.

హైదరాబాద్ లోని ఖైరతాబాద్ (టీఎస్ 09) పరిధిలోని ఫ్యాన్సీ నెంబర్ల వేలం పెడితే.. కొన్ని నెంబర్లు లక్షల రూపాయిలు పలికాయి. ఆసక్తికరమైన విషయం ఏమంటే.. నెంబరు 1తో పోలిస్తే నెంబరు 9కే ఎక్కువ ప్రాధాన్యత ఇవ్వటమే కాదు.. డబ్బులు చెల్లించేందుకు సైతం  వెనుకాడని పరిస్థితి నెలకొంది.

'0001' నెంబరుకు వేలంలో రూ.6.5 లక్షలు పలికితే.. '9999' నెంబరుకు ఏకంగా రూ.11.05 లక్షల ధర పలికింది. మొత్తంగా తాజాగా నిర్వహించిన వేలం పాట లక్షల రూపాయిల ఆదాయాన్ని రవాణా శాఖకు వచ్చేలా చేశాయి.

కొన్ని నెంబర్లను దక్కించుకోవటం కోసం పోటాపోటీ నెలకొని ఉండటమే కాదు.. డబ్బుల్ని లక్ష్య పెట్టని వైనం కనిపించింది. తాజాగా వేలంలో లక్షలు పలికి నెంబర్లను చూస్తే..

నెంబరు                                  వేలంలో పలికిన ధర (రూ.లక్షల్లో)

TS09 FW 9999                        11.05
TS09 FX 0001                         6.50
TS09 FX 0099                         5.22
TS09 TX 0009                         5.0
TS09 FX 0111                         2.25
TS09 FX 0007                         2.02
TS09 FX 0005                         1.70
TS09 FX 0006                         1.61
TS09 FX 0002                         1.06