క‌నీవినీ ఎరుగ‌ని ఘ‌ట‌నః కొవిడ్ బాధితుడు ఆసుప‌త్రిలో ఏం చేశాడో తెలుసా?

ఇప్పుడు దేశం మొత్తం కొవిడ్‌ సెకండ్ వేవ్ ధాటికి హ‌డ‌లెత్తిపోతోంది. ఎక్క‌డ త‌మ‌కు క‌రోనా అంటుకుంటుందో అని జ‌నం బిక్కుబిక్కుమంటూ బ‌తుకుతున్నారు. పొర‌పాటున క‌రోనా అంటిందంటే.. పై ప్రాణాలు పైన్నే పోతున్నాయి చాలా మందికి! కానీ.. కొవిడ్ సోకిన ఓ వ్య‌క్తి ఆసుప‌త్రిలో చేసిన ప‌ని చూసి ఐఏఎస్ అధికారి అమితాశ్చ‌ర్యం వ్య‌క్తం చేశారు. అంతేకాదు.. అతడి ఫొటో తీసి సోష‌ల్ మీడియాలో పోస్టు చేశారు.

ఒడిశాలోని కులాంగే జిల్లా ప‌రిధిలోని ఓ ఆసుప‌త్రిని త‌నిఖీ చేయ‌డానికి ఐఏఎస్ ఆఫీస‌ర్‌ విజ‌య్ వెళ్లారు. అయితే.. ఆసుప‌త్రిలో అంద‌రినీ ప‌రిశీలిస్తూ వెళ్తుండ‌గా.. ఓ బెడ్ ద‌గ్గ‌ర స‌డ‌న్ గా ఆగిపోయారు. ఆ బెడ్ పై కూర్చున్న కొవిడ్ బాధితుడు సీరియ‌స్ గా త‌న‌ప‌ని తాను చేసుకుంటున్నారు. అత‌ని చుట్టూ పుస్త‌కాలు ఉన్నాయి. ఓ కాలిక్యులేట‌ర్ ఉంది. చేతిలో పెన్నుతో ఏవేవో రాసుకుంటున్నాడు. ఇది చూసిన ఐఏఎస్ ఆశ్చ‌ర్యం వ్య‌క్తంచేశారు.

వివ‌రాలు ఆరాతీస్తే.. అత‌డు ఓ చార్టెడ్ అకౌంట్ విద్యార్థిగా తేలింది. ఆ విద్యార్థి తాను రాయాల్సిన సీఏ ప‌రీక్ష కోసం చ‌దువుతున్నాడు. అత‌నికి కొవిడ్ వ‌చ్చింద‌న్న బాధే కాదు.. అస‌లు ఆలోచ‌న కూడా లేక‌పోవ‌డం గ‌మ‌నార్హం. ఈ విష‌యాన్ని ట్విట‌ర్ ద్వారా వెల్ల‌డించారు స‌ద‌రు ఐఏఎస్‌. స‌ద‌రు విద్యార్థి.. త‌న‌కు క‌రోనా వ‌చ్చింద‌న్న ఆలోచ‌నే లేకుండా.. భ‌విష్య‌త్ పై ఆశాభావంతో చ‌దువుకుంటున్నాడ‌ని, అంద‌రూ ఇదేవిధంగా ఉండాల‌ని ట్వీట్ చేశారు.

ఈ పోస్టు.. స‌ద‌రు విద్యార్థి ఫొటో.. సోష‌ల్ మీడియాలో తెగ వైర‌ల్ అవుతోంది. ఈ పోస్టు చూసిన వారంతా అత‌న్ని అభినందించ‌కుండా ఉండ‌లేక‌పోతున్నారు. అత‌ని ఆలోచ‌ని విధానాన్ని మెచ్చుకుంటూ కామెంట్లు చేస్తున్నారు. 'మీరు కొవిడ్ ను మాత్రమే కాదు.. సీఏను కూడా గెలుస్తారు..' అంటూ ఆల్ ది బెస్ట్ చెబుతున్నారు.