ఉచిత నల్లా వాటర్.. ఓటు వేయకుండా చేయనుందా?

ఎన్నికల మేనిఫేస్టోలో అందరిని ఆకర్షించటమే కాదు.. హాట్ టాపిక్ గా మారిన హామీ.. ఉచిత నల్లా నీళ్లు. నల్లా కనెక్షన్ ఉన్న వారు ఎవరైనా సరే.. 20వేల లీటర్ల వరకు నీళ్లకు ఎలాంటి బిల్లులు చెల్లించాల్సిన అవసరం లేదని సీఎం కేసీఆర్ చెప్పారు. అంతేకాదు.. ఒకవేళ ఎవరైనా 30వేల లీటర్లు నెలలో వాడితే.. ప్రభుత్వం హామీ ఇచ్చిన 20వేల లీటర్లు తీసేసి కేవలం 10వేల లీటర్లు మాత్రమే బిల్లు వేయనున్నారు. ఊరించే ఈ ఒక్క హామీ చాలు.. గ్రేటర్ ఎన్నికల్లో టీఆర్ఎస్ ను గెలిపించటానికి అని చెబుతున్నారు.

అయితే.. గులాబీ బాస్ అనుకున్న దానికి.. వాస్తవానికి మధ్య తేడా కొట్టొచ్చినట్లు కనిపిస్తోందంటున్నారు. కేసీఆర్ భావించినట్లుగా ఉచిత నీళ్ల హామీ ఎదురుదెబ్బ వేసేలా ఉందంటున్నారు. ఎందుకంటే.. అధికారంలో ఉన్నది కేసీఆరే. అలాంటప్పుడు ఎన్నికల వరకు ఇలాంటి ఉచితాన్ని ఆపాలెందుకు. విడి రోజుల్లో ఎందుకు అమలు చేయలేదు? ఐదేళ్లు పాలించినప్పుడు లేని ఉచితం ఇప్పుడే ఎందుకు ఇస్తున్నట్లు? మా ఓట్ల కోసం ఇచ్చే ఉచితాన్నితిప్పి కొట్టేస్తామంటూ పలువురు మండిపడుతున్నారట.

మరీ.. మేమంత అమాయకులం మాదిరి కనిపిస్తున్నామా? కేసీఆర్ ఫ్రీ నీళ్లు అంటే ఓట్లు గుద్దేస్తామా? ఉచితాల పేరుతో మమ్మల్ని మభ్య పెట్టాలనుకుంటున్నారా? ఈసారి మేమేమిటో చూపిస్తామంటూ పలుకాలనీల్లో వినిపిస్తున్న మాటలు.. టీఆర్ఎస్ అధినాయకత్వానికి ఇబ్బందిగా మారినట్లు చెబుతున్నారు. ఉచిత నీళ్లతో సీన్ మొత్తం మారిపోతుందన్న తమ అంచనాలకు భిన్నమైన ఫీడ్ బ్యాక్ వస్తున్నట్లుగా గులాబీ బ్యాచ్ కు చెందిన కొందరు లోగుట్టుగా ఆందోళన వ్యక్తం చేయటం గమనార్హం.