హైదరాబాద్ లోనే కాదు - ఢిల్లీలోనూ జగన్ కు ఘనస్వాగతం!

అమరావతిలో విజయకేతనం ఎగరేసి, హైదరాబాద్ వెళ్లినప్పుడు వైఎస్సార్ కాంగ్రెస్ పార్టీ అధినేత జగన్ మోహన్ రెడ్డికి ఆయన అభిమానులు ఘన స్వాగతం పలికారు. వైఎస్సార్ కాంగ్రెస్ పార్టీ విజయబావుటా ఎగరేసిన నేపథ్యంలో హైదరాబాద్ లో అభిమానులు భారీగా హంగామా చేశారు. జగన్ విజయాన్ని అక్కడ సంబరంగా సెలబ్రేట్  చేసుకున్నారు అభిమానులంతా. హైదరాబాద్ లో జగన్ విజయంపై భారీగా ఫ్లెక్సీలు వెలిశాయి. జగన్ హైదరాబాద్ వచ్చిన సమయంలో అయితే అభిమానుల ఉత్సాహానికి అవధులు లేవు.

గవర్నర్, కేసీఆర్ లను కలవడానికి జగన్ మోహన్ రెడ్డి హైదరాబాద్ రాగా ఆయన అభిమానులు భారీ ఎత్తున స్వాగతం పలికారు. జగన్ ను నీరాజనాలు పట్టారు. హైదరాబాద్ లో కూడా భారీ ఎత్తున సీమాంధ్ర సెటిలర్లు ఉన్న సంగతి తెలిసిందే. అలాగే తెలంగాణలోనూ ‘వైఎస్’కంటూ ప్రత్యేక అభిమానగణం ఉంది. దీంతో హైదరాబాద్ లో జగన్ మోహన్ రెడ్డికి భారీగా స్వాగత సత్కారాలు చేసుకున్నారు అభిమానులు.

విశేషం ఏమిటంటే జగన్ మోహన్ రెడ్డికి ఢిల్లీలో కూడా అదే స్థాయిలో స్వాగతం పలికారు అభిమానులు. మోడీని కలవడానికి ఢిల్లీ వెళ్లిన జగన్ మోహన్ రెడ్డికి ఢిల్లీలోని ఎయిర్ పోర్టులోనే అభిమానుల నుంచి ఘనమైన స్వాగతం లభించింది. జగన్ ఢిల్లీ చేరుకునే సమయానికి అక్కడకు ఆయన అభిమానులు భారీ ఎత్తున చేరుకున్నారు. జగన్ మోహన్ రెడ్డికి స్వాగతం పలికారు.

మరి కొందరు వీఐపీ లాంజ్ ను చేరుకుని జగన్ కు స్వాగతం పలికారు. ఘన విజయం సాధించి ఢిల్లీ చేరుకున్న వైఎస్ఆర్సీపీ అధినేతకు వారు సందడిగా స్వాగతం పలికారు. అలాగే ఏపీ భవన్ పరిసరాలు కూడా సందడిగా మారాయి. జగన్ కు ఢిల్లీలో ఉన్న నేపథ్యంలో అక్కడ కూడా అభిమానుల, తెలుగు వాళ్ల హంగామా కొనసాగుతోంది.