గులాబీ పార్టీలో లొల్లి షురూ.. సంతోష్ ఫ్లెక్సీని తగలబెట్టేశారు

ఓపక్క కరోనాతో ఆగమాగమైపోతున్న వేళ..తెలంగాణ అధికారపక్షంలో అనూహ్య పరిణామాలు చోటు చేసుకున్నాయి. అంచనాలకు అందని విధంగా.. తెర వెనుక జరిగిన పరిణామాలకు పుల్ స్టాప్ పెట్టి.. యాక్షన్ పార్ట్ మొదలైనట్లు చెబుతున్నారు. ఈ క్రమంలోనే కేసీఆర్ సొంత చానల్ లో ‘‘ఆరోగ్య మంత్రికి కబ్జా రోగం’’ పేరుతో భూమిని కబ్జా చేసినట్లుగా ప్రత్యేక కథనాన్ని ప్రసారం చేయటం సంచలనంగా మారింది.

ఇప్పటివరకు తెర వెనుక మాత్రమే కనిపించే.. వినిపించే గొడవలు.. జనాల ముందుకు రావటం చూస్తే.. ఈటెల విషయంలో సీఎం కేసీఆర్ ఒక నిర్ణయానికి వచ్చినట్లుగా తెలుస్తోంది. ఇందులో భాగంగానే ఆయనపై వ్యతిరేక కథనాన్ని ప్రసారం చేసేందుకు గ్రీన్ సిగ్నల్ ఇచ్చేసినట్లుగా చెబుతున్నారు. దీంతో.. ఈటెల వర్గీయులు తీవ్ర ఆగ్రహాన్ని వ్యక్తం చేస్తున్నారు.

తమ నాయకుడి మీద వస్తున్న వ్యతిరేక కథనాలపై రగిలిపోయిన ఈటెల వర్గీయులు.. కేసీఆర్ కు అత్యంత సన్నిహితుడు.. బంధువు అయిన రాజ్యసభ సభ్యుడు జోగినపల్లి సంతోష్ పై తీవ్ర ఆగ్రహాన్ని వ్యక్తం చేస్తున్నారు. దీనికి కారణం టీ న్యూస్ చానల్ సంతోష్ కీలకభూమిక పోషించటమే. దీంతో.. తమ నాయకుడిపై విషం జల్లేలా కథనాలు అల్లుతున్న తీరుపై మండిపడుతున్నారు.

ఈటెల ప్రాతినిధ్యం వహిస్తున్న హుజురాబాద్ నియోజకవర్గంలో సంతోష్ దిష్టిబొమ్మను దగ్థం చేయటంతో పాటు.. ఫ్లెక్సీ మీద పెట్రోల్ పోసి తగలబెట్టారు. సంతోష్ కు వ్యతిరేకంగా నినాదాలు చేశారు. సంతోష్ ఎలా ఎదిగారో గుర్తుందా? అంటూ మండిపడుతున్నారు. ఈ సందర్భంగా ఈటెల అనుచరులు.. ఆయన అభిమానులు చేస్తున్న వ్యాఖ్యలు సంచలనంగా మారాయి. సంతోష్ ప్లెక్సీని నిప్పు పెట్టిన వీడియో ఇప్పుడు వైరల్ గా మారింది.