ఆంధ్ర‌జ్యోతికి సాయం చేస్తాన‌న్న ఈనాడు

వ్యాపారంలో పోటీ ఉండొచ్చు కానీ..కొన్ని విష‌యాల వ‌ద్ద‌కు వ‌చ్చిన‌ప్పుడు మాత్రం వ్యాపారానికి అతీతంగా వ్య‌వ‌హ‌రించ‌టం కొంత‌మంది వ్యాపారస్తులు మాత్ర‌మే చేస్తుంటారు. తాజాగా త‌న‌లో ఆ గుణం ఉంద‌న్న విష‌యాన్ని చెప్ప‌క‌నే చెప్పేశారు మీడియా మొఘ‌ల్‌.. ఈనాడు సంస్థ‌ల అధిప‌తి.. రామోజీరావు.

ఇటీవ‌ల ఆంధ్ర‌జ్యోతి ప్ర‌ధాన కార్యాల‌యంలో జ‌రిగిన ఫైర్ యాక్సిడెంట్‌ పై రామోజీరావు విచారం వ్య‌క్తం చేశారు. తాజాగా ఆంధ్ర‌జ్యోతి ఎండీ వేమూరి రాధాకృష్ణ‌కు ఫోన్ చేశారు. ప్ర‌మాదం జ‌రిగిన ఘ‌ట‌న గురించి వివ‌రాలు అడిగి తెలుసుకున్నారు. జ‌రిగిన న‌ష్టం గురించి.. ప్ర‌మాద తీవ్ర‌త గురించి వివ‌రాలు అడిగి తెలుసుకున్న రామోజీ.. ఈ సంద‌ర్భంగా ఒక ప్ర‌తిపాద‌న చేసిన‌ట్లుగా చెబుతున్నారు.

ఫైర్ యాక్సిడెంట్ నేప‌థ్యంలో.. ప‌త్రిక నిర్వ‌హ‌ణ‌కు సంబంధించి ఎలాంటి స‌హ‌కారం అవ‌స‌ర‌మైనా అందిస్తామ‌ని ఆర్కేకు రామోజీ స్ప‌ష్టం చేసిన‌ట్లుగా చెబుతున్నారు. పోటాపోటీగా వ్యాపారం ఉన్న‌ప్పుడు.. ప్ర‌త్య‌ర్థికి అనుకోని ఇబ్బందులు ఎదురైన‌ప్పుడు.. సాయంగా నిలుస్తామ‌న్న మాట చాలా అరుదుగా వింటుంటాం. తాను అలాంటి కోవ‌కు చెందిన వ్య‌క్తిన‌న్న విష‌యాన్ని త‌న చేత‌ల‌తో చెప్ప‌క‌నే చెప్పేశారు రామోజీ.

Like Us on Facebook : https://www.facebook.com/Tupakidotcom/