అమెరికా స్కూల్లో కాల్పులు..ముగ్గురు మృతి

అగ్ర‌రాజ్యం అమెరికాలో మ‌రో విషాదం చోటు చేసుకుంది. ఒక స్కూల్లో కాల్పులు చోటు చేసుకున్నాయి. ఈ విషాద‌క‌ర ఘ‌ట‌న‌లో ముగ్గురు మ‌ర‌ణించారు. ప్ర‌శాంతంగా ఉంటూ.. ఆహ్లాద‌క‌ర‌మైన జీవితాన్ని అనుభ‌వించొచ్చ‌న్న భావ‌న అమెరికాపై ఒక‌ప్పుడు ఉండేది. కానీ.. ఇప్పుడు ప‌రిస్థితి మారిపోయింది. త‌న మాట‌ల‌తో నిత్యం వాతావ‌ర‌ణాన్ని వేడెక్కించేలా అమెరికా అధ్య‌క్షుడు ట్రంప్ పుణ్య‌మా అని ఎప్పుడేం జ‌రుగుతుందో అర్థం కాని ప‌రిస్థితి. ఇది స‌రిపోవ‌న్న‌ట్లుగా వివ‌క్ష‌.. జాత్యాంహ‌కారం లాంటివి అంత‌కంత‌కూ పెరుగుతున్నాయి.

తాజాగా త‌న భార్య‌తో ఉన్న పంచాయితీ నేప‌థ్యంలో.. భార్య మీద ప‌గ తీర్చుకోవ‌టానికి ఒక దుండ‌గుడు వేసిన వీరంగం ముగ్గురు ప్రాణాల్ని బ‌లి తీసుకోవ‌ట‌మే కాదు..త‌న ప్రాణాల్ని తాను తీసుకున్నాడు. ఈ విషాద ఉదంతంలోకి వెళితే.. కాలిఫోర్నియాలోని శాన్ బెర్నాడినో న‌గ‌రంలో ఒక పాఠ‌శాల‌లోకి జొర‌బ‌డిన ఒక ఆగంత‌కుడు.. ఒక టీచ‌ర్‌తోపాటు.. మ‌రికొంద‌రిపై విచ‌క్ష‌ణార‌హిత‌గ‌గా కాల్పులు జ‌రిపిన ఉదంతం తీవ్ర క‌ల‌క‌లాన్ని రేపుతోంది.

ఈ కాల్పుల ఘ‌ట‌న‌లో మ‌ర‌ణించిన టీచ‌ర్ భ‌ర్తే.. కాల్పులు జ‌రిపిన ఆగంతుడిగా గుర్తించారు. మాజీ భార్య‌పై ప‌గ తీర్చుకోవ‌టానికే అత‌గాడు ఇంత దారుణానికి పాల్ప‌డిన‌ట్లుగా భావిస్తున్నారు. ఆగంతుడి కాల్పుల కార‌ణంగా టీచ‌ర్ తో స‌హా మ‌రో విద్యార్థి అక్క‌డిక‌క్క‌డే మ‌ర‌ణించ‌గా.. మ‌రో ఇద్ద‌రు విద్యార్థుల‌కు తీవ్రంగా గాయాలకు గుర‌య్యారు. ఆసుప‌త్రిలో చికిత్స చేస్తుండ‌గా మ‌రో విద్యార్థి ప్రాణాలు కోల్పోయారు. దీంతో.. ఈ ఘ‌ట‌న‌లో ఇప్ప‌టివ‌ర‌కూ ముగ్గురు ప్రాణాలు కోల్పోవ‌టం గ‌మ‌నార్హం.

Like Us on Facebook : https://www.facebook.com/Tupakidotcom/