చలితోపాటే.. కరోనా పులి వచ్చేస్తోంది!

కరోనా మహమ్మారి ప్రపంచదేశాలతోపాటూ మన దేశాన్ని అతలాకుతలం చేసింది. ఇప్పటికే పలు రంగాలు కుదేలయ్యాయి. దేశ ఆర్థికవ్యవస్థ కూడా పతనమైంది. వ్యాక్సిన్​ త్వరలోనే వస్తుందన్న ప్రకటనలే తప్పితే.. ఇంతవరకూ వ్యాక్సిన్​ పంపిణీ కార్యరూపం దాల్చలేదు. ఈ నేపథ్యంలో కరోనా మహమ్మారిపై గురించి డబ్ల్యూహెచ్​వో మరో పిడుగులాంటి వార్త చెప్పింది. భారతదేశంలో రానున్న చలికాలంలో కరోనా మరింత విజృంభించనుందని.. ప్రజలంతా జాగ్రత్తగా ఉండాలని సూచించింది. ఇప్పటికే బిక్కుబిక్కు మంటూ కాలం వెళ్లదీస్తున్న ప్రజలకు ఈ వార్త విని ములిగే నక్కమీద తాటికాయ పడ్డట్టయ్యింది. ఇప్పటికే రెండు తెలుగురాష్ట్రాల్లోనూ కరోనా విజృంభిస్తోంది. ఈ నేపథ్యంలో చలికాలంలో మరింత వ్యాప్తి చెందితే పరిస్థితి ఏమిటని ప్రజలు ఆందోళన చెందుతున్నారు. ప్రతిఏడాది చలితో ఎంతోమంది వృద్ధులు, బలహీనంగా ఉన్నవాళ్లు ప్రాణాలు కోల్పోతూ ఉంటారు. ఈ సారి కరోనాకూడా తోడైతే మరణాల సంఖ్య మరింత పెరిగే అవకాశం ఉంటుందని వైద్యనిపుణులు పేర్కొంటున్నారు.

ఆస్తమారోగులూ.. జర జాగ్రత్త
ప్రస్తుతం మనదేశంలో కరోనా ఓ రేంజ్​లో విరుచుకుపడుతోంది. ప్రతిరోజూ సరాసరి 70 వేల పైచిలుకు కేసులు నమోదవుతున్నాయి. ఇప్పటికే కరోనా కేసుల్లో ప్రపంచంలో రెండో స్థానంలో ఉన్నాం. మరికొన్ని రోజుల్లోనే మొదటిస్థానానికి ఎగబాకవచ్చు. మరోవైపు కరోనాతో ఆస్తమా రోగాలు జాగ్రత్తగా ఉండాలని డబ్ల్యూహెచ్​వో హెచ్చరిస్తోంది. ఆస్తమా రోగులకు కరోనా తొందరగా వచ్చే అవకాశం ఉంటున్నదని చెబుతోంది. ఊపిరితిత్తులు, శ్వాసకోశ వ్యాధిగ్రస్తులతో పాటు ఆస్తమా, హృద్రోగులు చలికాలంలో జాగ్రత్తగా ఉండాలని  డబ్ల్యూహెచ్​వో హెచ్చరిస్తోంది.