కన్నడ అల్లరి మనోళ్ళకి ఎక్కేనా?

ఈ మధ్యకాలంలో కన్నడంలో మంచి కంటెంట్ బేస్డ్ కథలు తెరకెక్కుతున్నాయి. కొత్త దర్శకులు యూనిక్ కాన్సెప్ట్ తో మూవీస్ చేస్తూ హిట్ కొడుతున్నారు. అవి ఇతర భాషలలోకి కూడా డబ్ అయ్యి బ్లాక్ బస్టర్ టాక్ సొంతం చేసుకుంటున్నాయి. కేజీఎఫ్ సిరీస్, కాంతారా తర్వాత కన్నడ నుంచి రాబోతున్న మంచి క్రేజీ మూవీ బాయ్స్ హాస్టల్. కన్నడంలో అందరూ కొత్తవాళ్లుతో తెరకెక్కిన హాస్టల్ హుడుగారు బేకగిద్దరే మూవీ బ్లాక్ బస్టర్ హిట్ అయ్యింది.

ఈ చిత్రాన్ని అన్నపూర్ణ స్టూడియోస్, చాయ్ బిస్కెట్ సంయుక్తంగా తెలుగులో డబ్బింగ్ చేశారు. ఈ నెల 26న ఈ చిత్రం రిలీజ్ కి రెడీ అవుతోంది. అవుట్ అండ్ అవుట్ కామెడీ ఎంటర్టైనర్ గా తెరకెక్కి కన్నడనాట సెన్సేషన్ హిట్ ని ఈ చిత్రం అందుకుంది. యూత్ ఆడియన్స్ కి కనెక్ట్ అయ్యే అంశాలు పుష్కలంగా ఉండటంతో తెలుగు ప్రేక్షకులకి కూడా నచ్చుతుందని డబ్ చేశారు.

అయితే ఏదో రెగ్యులర్ డబ్బింగ్ చిత్రంలా కాకుండా తెలుగు నేటివిటీకి కంప్లీట్ గా కనెక్ట్ అయ్యే విధంగా డైలాగ్స్ మళ్ళీ ఫ్రెష్ గా రాసి, అదనంగా తరుణ్ భాస్కర్, రష్మికతో కొన్ని సన్నివేశాలు యాడ్ చేసి, ప్రొఫెషనల్ గా అందించబోతున్నారు. తాజాగా ఈ మూవీ ట్రైలర్ ప్రేక్షకుల ముందుకి వచ్చింది. కాలేజీలో బాయ్స్ హాస్టల్స్ లో ఉండే గందరగోళం మొత్తం ఈ మూవీలో కనిపిస్తోంది.

హాస్టల్ లైఫ్ స్టైల్ చూసిన ప్రతి ఒక్కరు ఈ స్టోరీని రిలేట్ చేసుకునే అవకాశం ఉందని చెప్పొచ్చు. హాస్టల్స్ లో స్టూడెంట్స్ ని కంట్రోల్ చేసే వార్డెన్ అకస్మాత్తుగా చనిపోతే, అతని డెడ్ బాడీని మాయం చేయడానికి వారందరూ ఏం చేశారు అనేది ఈ మూవీ కాన్సెప్ట్ గా ఉంది. కాంతారాకి మ్యూజిక్ అందించిన అంజనీష్ లోకానాధ్ బ్యాగ్రౌండ్ స్కోర్ యూత్ ఎట్రాక్ట్ చేసే విధంగా ఉంది.

కన్నడంలో సూపర్ హిట్ అయ్యి తెలుగులోకి వస్తోన్న ఈ యూత్ ఫుల్ కామెడీ ఎంటర్టైనర్ తెలుగు ప్రేక్షకులని ఏ మేరకు మెప్పిస్తుందనేది వేచి చూడాలి. ఇప్పటికే చాయ్ బిస్కెట్ మేమ్ ఫేమస్ సినిమాతో యూత్ ఫుల్ కంటెంట్ అందించి సూపర్ హిట్ కొట్టారు. ఇప్పుడు బాయ్ హాస్టల్ తో మరో సక్సెస్ ని వారి ఖాతాలో వేసుకుంటారో లేదో చూడాలి.