సంక్రాంతి పోటీపై ఓ క్లారిటీ ఇచ్చేసిన వెంకీ

టాలీవుడ్‌లో సంక్రాంతి పండగ అంటేనే స్టార్స్ మధ్య పోటీ ఉండడం కామన్. కానీ ఈసారి సంక్రాంతి పోటీ చాలా డిఫరెంట్ గా ఉండబోతోంది. గేమ్ ఛేంజర్ - డాకూ మహరాజ్ తో పాటు మరో మాస్ ఎంటర్టైనర్ ‘సంక్రాంతికి వస్తున్నాం’ ఆడియన్స్‌ను అలరించేందుకు సిద్ధమవుతోంది. విక్టరీ వెంకటేష్, అనిల్ రావిపూడి, శ్రీ వెంకటేశ్వర క్రియేషన్స్ బేనర్ కలయికలో వస్తున్న ఈ సినిమా ట్రైయాంగుల్ స్టోరీతో అందరి దృష్టిని ఆకర్షిస్తోంది. దిల్ రాజు సమర్పణలో శిరీష్ ఈ చిత్రాన్ని నిర్మించారు. ఈ సినిమా 2025 జనవరి 14 సంక్రాంతి పండగ సందర్భంగా విడుదల కానుంది.

ఇక నేడు రిలీజ్ డేట్ ఎనౌన్స్ మెంట్ పై ప్రత్యేకంగా ప్రెస్ మీట్ నిర్వహించారు. ఈ సందర్భంగా వెంకటేష్ ఈ చిత్రంపై ప్రత్యేకంగా స్పందించారు. "ఈ సినిమా పేరే ‘సంక్రాంతికి వస్తున్నాం.’ సంక్రాంతి పండగ కోసం ఎంటర్టైనర్‌గా దీన్ని తెరపైకి తీసుకురావాలని నిర్ణయించాం. అందరికీ ఈ సినిమా నచ్చుతుందనే నమ్మకం ఉంది. కుటుంబ కథా చిత్రాలతో పాటు యాక్షన్, క్రైమ్ ఎలిమెంట్స్ ఇందులో ఉన్నాయి. ఫ్యామిలీ ఆడియన్స్ మాత్రమే కాదు, మాస్ ఆడియన్స్ కూడా బాగా ఎంజాయ్ చేస్తారు," అని చెప్పిన వెంకటేష్, సినిమా చూసి ప్రేక్షకులు తృప్తి పొందుతారని అభిప్రాయపడ్డారు.

వెంకటేష్ తన పాత్ర గురించి మాట్లాడుతూ, “ఈ పాత్ర నా కెరీర్‌లో ప్రత్యేకమైనది. గెటప్, మేకోవర్ చాలా కొత్తగా ఉంటాయి. ఈ సినిమాలో నాకు సంబంధించిన సన్నివేశాలు ప్రేక్షకులను ఆకట్టుకుంటాయి. అనిల్ రావిపూడి నాకు అద్భుతమైన కథతో వచ్చారు. ఆయనతో పని చేయడం ఎప్పుడు హ్యాపీగా ఆనందంగా అనిపిస్తుంది. ఈ కథ ఎంటర్టైనింగ్‌గా ఉండడమే కాదు, భావోద్వేగాలతో నిండి ఉంటుంది. కుటుంబ కథాచిత్రాలకు నా అభిమానులు ఇష్టపడతారని నాకు తెలుసు. కానీ ఈసారి కొత్తగా ట్రీట్ అందించబోతున్నాం" అని అన్నారు.

ఈ సినిమాలో వెంకటేష్ సరసన ఐశ్వర్య రాజేష్, మీనాక్షి చౌదరి ప్రధాన పాత్రల్లో నటిస్తున్నారు. ఒకరు అతని ప్రస్తుత భార్యగా, మరొకరు ఎక్స్ లవర్ గా కనిపించనున్నారు. ఈ పాత్రలు కథలో కీలక మలుపులు తీసుకొస్తాయి. సంగీతం భీమ్స్ సిసిరోలియో అందించగా, రమణ గోగుల పాడిన మొదటి పాట త్వరలోనే విడుదల కానుంది.

ఇక సంక్రాంతి బరిలో పోటీ పై కూడా వెంకటేష్ స్పందించారు. ‘గేమ్ చేంజర్,’ ‘డాకూ మహారాజ్’ వంటి పెద్ద చిత్రాలు కూడా రానున్నాయి, అన్ని సినిమాలు హిట్ అయితేనే ఇండస్ట్రీ బాగుంటుంది అని వెంకటేష్ స్పష్టం చేశారు. "ఇతర సినిమాల విజయంతో పాటు మా సినిమా కూడా ప్రేక్షకుల మన్ననలు పొందుతుంది. మా టీమ్ ఎంతో కష్టపడి పనిచేసింది. ఈ సినిమా అందరికీ ఒక మంచి పండగ ట్రీట్ అవుతుందనే నమ్మకం ఉంది," అని ఆయన అభిప్రాయపడ్డారు. ఇంతకు ముందు అనిల్ రావిపూడి వెంకటేష్ కాంబోకు బ్లాక్ బస్టర్ హిట్ రికార్డ్ ఉండగా, ఈసారి కూడా అదే విజయం కొనసాగుతుందనే ఆశతో సినిమా రిలీజ్‌కు సిద్ధమవుతోందని దిల్ రాజు అన్నారు.