బాహుబ‌లి 2 ఖాతాలో ఊహించ‌లేని రికార్డు

తెలుగు సినిమాకు ప్ర‌పంచ స్థాయి గుర్తింపు తీసుకురావ‌ట‌మే కాదు.. ఈ రోజున భార‌త చ‌ల‌న‌చిత్ర ప‌రిశ్ర‌మ సైతం స‌గ‌ర్వంగా చెప్పుకునే స్థాయికి బాహుబ‌లి  2 చేరింది. ఇప్ప‌టికే రికార్డు క‌లెక్ష‌న్ల‌తో దుమ్ము రేపిన బాహుబ‌లి 2 ఖాతాలో బోలెడ‌న్ని రికార్డులు చేరిపోయాయి. సినిమా విడుద‌లై నెల‌లు గ‌డుస్తున్నా.. ఒకటి త‌ర్వాత మ‌రొక‌టి చొప్పున రికార్డులు ఆ చిత్రం ఖాతాలోకి చేరుతున్నాయి.

తాజాగా ఓ బాలీవుడ్ మీడియా క‌థ‌నం ప్ర‌కారం బాహుబలి 2 సాధించిన స‌న్సేష‌న‌ల్ రికార్డుల్లో మ‌రొక‌టి చేరింద‌ని చెబుతున్నారు. ఇప్ప‌టివ‌ర‌కూ బాహుబ‌లి 2 సినిమా కోసం 5,40,43,000 టికెట్లు తెగిన‌ట్లుగా చెబుతున్నారు. కాస్త అటూఇటూగా ఐదున్న‌ర కోట్ల టికెట్లు అన్న మాట‌.

ఇంత భారీ ఎత్తున టికెట్లు తెగిన మూడో చిత్రంగా బాహుబ‌లి 2 నిలిచింద‌ని పేర్కొంది. భార‌త చ‌ల‌న‌చిత్ర చ‌రిత్ర‌లో హ‌మ్ ఆప్కే హై కౌన్ చిత్రానికి 7,39,67,000 టికెట్లు అమ్ముడు కాగా.. ఆల్ టైం క్లాసిక్ షోలే 5,52,34,000 టికెట్లు అమ్ముడ‌య్యాయి.  ఈ ఖాతాలో బాహుబ‌లి 2 మూడో స్థానంలో నిలిచింది. త్వ‌ర‌లో చైనాలో బాహుబ‌లి 2 విడుద‌ల కానున్న నేప‌థ్యంలో.. టికెట్ల రికార్డు మ‌రింత మెరుగుప‌డ‌టం ఖాయ‌మ‌ని చెప్పాలి. తాజా అంచ‌నాల ప్ర‌కారం.. టికెట్ల తెగే విష‌యంలో బాహుబ‌లి 2  రెండో స్థానంలో నిలుస్తుంద‌న్న అభిప్రాయం వ్య‌క్త‌మ‌వుతోంది.