దూరదర్శిని.. 90ల నాటి ప్రేమను గుర్తుచేస్తూ..

ప్రేమకు కాలంతో సంబంధం లేకున్నా, కొన్ని ప్రేమ కథలు మాత్రం చరిత్రలో చెరిగిపోని గుర్తులుగా నిలుస్తాయి. అలాంటి కథతోనే ప్రేక్షకులను అలరించేందుకు సిద్ధమవుతోంది దూరదర్శిని సినిమా. "దూరదర్శిని - కలిపింది ఇద్దరిని" అనే ట్యాగ్ తో రూపొందుతున్న ఈ చిత్రం 90ల నాటి నేపథ్యంలో ఒక భిన్నమైన ప్రేమ కథను ప్రేక్షకులకు అందించబోతోంది. ఈ చిత్రంలో హీరోగా సువిక్షిత్ బోజ్జా, హీరోయిన్‌గా గీతికా రతన్ నటిస్తుండగా కార్తికేయ కొమ్మీ దర్శకత్వం వహిస్తున్నారు.

వరాహా మూవీ మేకర్స్ బ్యానర్‌పై బి. సాయి ప్రతాప్ రెడ్డి, జయ శంకర్ రెడ్డి నిర్మిస్తున్న ఈ సినిమా ప్రస్తుతం పోస్ట్ ప్రొడక్షన్ దశలో ఉంది. ఇక ఈ చిత్రం ఒక హృదయాన్ని హత్తుకునే ప్రేమ కథగా రూపుదిద్దుకుంటోంది. "దూరదర్శిని" పేరుతోనే 90ల కాలం గమనాన్ని అద్దం పట్టే ప్రయత్నం జరుగుతోంది. రిలీజ్ చేసిన టీజర్ లో బ్యాక్ గ్రౌండ్ ఆర్ట్ వర్క్ మంచి ఫీల్ ను కలిగిస్తోంది.

హరి - వాణి అనే సున్నితమైన క్యారెక్టర్స్ మధ్యలో సినిమా కథ ఉంటుందని క్లారిటీ ఇచ్చేశారు. ఇక ఆ తరువాత వచ్చే ఇబ్బందులు, ప్రేమలో ఉండే ఎమోషన్స్ ను హార్ట్ కు టచ్ అయ్యేలా చూపించనున్నట్లు తెలుస్తోంది. ఈ చిత్రానికి సంబంధించిన టైటిల్ టీజర్‌ను ప్రముఖ సంగీత దర్శకుడు ఆర్.పి. పట్నాయక్ ఆవిష్కరించారు. ఈ సందర్భంగా ఆయన మాట్లాడుతూ, "ఈ చిత్రానికి హీరో సువిక్షిత్ చాలా కష్టపడి పని చేశాడు. జెమిని సురేశ్ ఈ చిత్రంపై ఎంతో అభిమానం వ్యక్తం చేస్తూ, మంచి విజయాన్ని సాధిస్తుందని నమ్మకంగా చెబుతూ వచ్చాడు. 90ల ప్రేమను గుర్తుచేసే ఈ చిత్రం ప్రతీ ఒక్కరికి అనుభూతి పంచుతుంది" అని అన్నారు.

ఈ చిత్రంలో ఓ కీలక పాత్ర పోషించిన జెమిని సురేష్ మాట్లాడుతూ, "ఈ సినిమా నా కెరీర్‌లో ప్రత్యేకమైనది. 90ల కాలాన్ని అద్దం పట్టేలా దర్శకుడు అద్భుతంగా చిత్రీకరించాడు. ప్రేక్షకులను వారి స్వంత ప్రేమ కబుర్లకు తీసుకెళ్లే విధంగా ఈ కథ రూపుదిద్దుకుంది" అని వెల్లడించారు. సినిమాలో వాణి పాత్రలో నటిస్తున్న గీతికా రతన్ మాట్లాడుతూ, "ఈ చిత్రం 90ల నాటి స్వచ్ఛమైన ప్రేమను ఆవిష్కరించేలా రూపొందించబడింది. హరి, వాణి మధ్య ప్రేమకథ ఎంతో ఆసక్తికరంగా ఉంటుంది. ఈ ప్రాజెక్టులో భాగం కావడం నా అదృష్టంగా భావిస్తున్నాను" అని తెలిపారు.

హరి పాత్ర పోషిస్తున్న సువిక్షిత్ ఈ సందర్భంగా మాట్లాడుతూ, "90ల కాలాన్ని అద్దం పట్టేలా ఈ కథ నడుస్తుంది. ఇది ప్రతి ఒక్కరు వారు జీవించిన అనుభవాలను గుర్తు చేసుకునేలా ఉంటుంది. పాత్రలు, లొకేషన్లు అన్ని సహజంగా ఉండేలా డిజైన్ చేశాం. ఈ చిత్రంలోని భావోద్వేగాలు ప్రతీ ఒక్కరినీ కదిలిస్తాయి" అని నమ్మకాన్ని వ్యక్తం చేశారు. సినిమాలో ముఖ్య పాత్రలు పోషించిన ఇతర నటీనటులు, టెక్నీషియన్లు ఈ కార్యక్రమంలో పాల్గొని తమ అనుభవాలను పంచుకున్నారు. సంగీత దర్శకుడు ఆనంద్ గుర్రన్ అందించిన బాణీలు ఈ సినిమాకు ప్రధాన బలంగా నిలుస్తాయని చిత్రబృందం తెలిపింది. ప్రేక్షకులను 90ల కాలం మనస్సులోకి తీసుకెళ్లే ఈ చిత్రం త్వరలో విడుదలకు సిద్ధమవుతోంది. ‘దూరదర్శిని’ అందించే అనుభవం ఎలాంటి గుర్తులను మిగిలిస్తుందో తెలియాలంటే మరికొన్ని రోజులు వేచి చూడాలి.