రానా సోద‌రుడి ఎంట్రీలో అదిరిపోయే ట్విస్ట్

రానా దగ్గుబాటి సోదరుడు అభిరామ్ టాలీవుడ్ లో హీరోగా అరంగేట్రం చేయడానికి సిద్ధంగా ఉన్నార‌ని చాలా కాలంగా క‌థ‌నాలొస్తున్న సంగ‌తి తెలిసిందే. ఎట్ట‌కేల‌కు అత‌డిని తెర‌కు ప‌రిచ‌యం చేసే బాధ్య‌త‌ను ద‌ర్శ‌కుడు తేజ‌కు అప్పగించారు. ఈ ప్రాజెక్ట్ ఇటీవల లాక్ అయింది. ఇది తేజ మార్క్ రొమాంటిక్ ఎంటర్ టైనర్ అని ఊహాగానాలు సాగుతున్నా.. ఇందులో ఒక ట్విస్ట్ ఉంది.

అభిరామ్ ని రెగ్యుల‌ర్ హీరోలా చూపించే ఆలోచ‌న లేదు. రానా ఎలా అయితే లీడ‌ర్ తో డిఫ‌రెంట్ టోన్ ఉన్న‌ హీరోగా నిరూపించుకున్నాడో అలానే ఓ కొత్త పంథా స్క్రిప్టుతో బ‌రిలో దిగుతాడ‌ని తెలిసింది.అభిరామ్ కోసం తేజ హై-వోల్టేజ్ యాక్షన్ ఎంటర్ టైనర్ క‌థాంశాన్ని సిద్ధం చేశార‌ని తెలిసింది. సురేష్ బాబు ఇటీవల స్క్రిప్ట్ ని ఫైన‌ల్ చేశారు. తేజ‌తో క‌లిసి సురేష్ బాబు స్క్రిప్ట్ విష‌యంలో వ్యక్తిగత శ్రద్ధ వహిస్తున్నారు.

తేజ రెండు మూడు విభిన్న‌మైన స్క్రిప్టుల్ని రెడీ చేశారు. అందులో చిత్రం 1.1 ఒక‌టి. కానీ అభిరామ్ కి అది సూట్ కాద‌ని సురేష్ బాబు భావించార‌ట‌. అటుపై యాక్ష‌న్ ఎంట‌ర్ టైన‌ర్ కే మొగ్గు చూపార‌ని..తెలుస్తోంది. ఈ సినిమా చిత్రీక‌ర‌ణ త్వ‌ర‌లోనే ప్రారంభమవుతుంది. సురేష్ ప్రొడక్షన్స్ తో క‌లిసి వేరొక బ్యాన‌ర్ ఈ చిత్రాన్ని నిర్మించే వీలుంద‌ని చెబుతున్నారు.