చాలు.. ఇక చాలు.. విలన్ వేషాలు..

సీనియర్ దర్శకుడు రవిరాజా పినిశెట్టి కుమారుడిగా సినిమాల్లోకి వచ్చిన ఆది పినిశెట్టి.. ఆరంభంలో తన సినిమాలతో ఆడియన్స్ ను ఆకట్టుకోలేకపోయాడు. తెలుగుతో పాటు తమిళ్ లో కూడా కొన్ని సినిమాలలో నటించగా.. అన్నిటిలోను వైశాలి మూవీ ఒక్కటే జనాలను మెప్పించగలిగింది.

ఇంతలో ఆది పినిశెట్టికి సరైనోడు మూవీలో విలన్ పాత్రకు వచ్చింది. వైరం ధనుష్ గా నటించి యంగ్ విలన్ రోల్ లో అదరగొట్టేశాడు ఆది పినిశెట్టి. ఆ తర్వాత కూడా ప్రామిసింగ్ రోల్స్ వరుసగా వచ్చాయి. నిన్ను కోరి చిత్రంలో చేసిన సపోర్టింగ్ రోల్.. అజ్ఞాతవాసి మూవీలో విలన్ పాత్ర.. ఇతడికి మంచి పేరే తెచ్చిపెట్టాయి. ఇప్పుడు రామ్ చరణ్ మూవీ రంగస్థలంలో హీరోకి అన్నయ్య పాత్రలో నటిస్తుండగా.. ఇది కూడా విలన్ పాత్రే అనే టాక్ ఉంది. రంగస్థలంలో ఇతను ప్రతినాయక పాత్ర చేస్తున్నాడా లేదా అన్న ప్రశ్నకు కొన్ని గంటల్లో సమాధానం దొరికిపోతుంది కానీ.. ఇప్పటివరకూ చేసిన నెగిటివ్ పాత్రలు చాలు అని.. ఇకపై మాత్రం విలన్ వేషాలు వేయకూడదని అనుకుంటున్నాడట ఆది పినిశెట్టి.

ప్రస్తుతం ఇతడికి లీడ్ రోల్స్ లోనే బోలెడు అవకాశాలు వస్తున్నాయి. సమంత మూవీ యూ టర్న్.. కోన వెంకట్ నిర్మాతగా తాప్సీతో తీస్తున్న చిత్రాల్లో లీడ్ పాత్రల్లోనే కనిపించనున్నాడు ఆది పినిశెట్టి. స్టార్ హీరోయిన్స్ కూడా తనతో సినిమాలకు సై అనే రేంజ్ కి చేరుకోవడంతో.. ఇక విలన్ రోల్స్ కు చెక్ చెప్పేస్తున్నాడని టాక్.