ఎన్టీఆర్ బయోపిక్ లో లక్ష్మి పార్వతి పాత్ర?

ఎన్టీఆర్ బయోపిక్ కు సంబంధించిన విశేషాలు పోస్టర్లతో నందమూరి అభిమానులు ఉక్కిరిబిక్కిరి అవుతున్నారు. అందులో నటిస్తున్న ఒక్కొక్కరి పుట్టినరోజు సందర్భంగా వాళ్ళ ఫస్ట్ లుక్స్ ని విడుదల చేస్తుండటంతో హైప్ అంతకంతకు పెరిగిపోతోంది. దర్శకుడు క్రిష్ చాల ప్లాన్డ్ గా ప్రమోట్ చేస్తున్న విధానం జనవరిలో వస్తున్న మిగిలిన సినిమాల కంటే రేస్ లో ముందుండేలా చేస్తోంది. ఎన్టీఆర్ జీవితాన్ని తెరమీద చూపించే ప్రయత్నం జరుగుతున్నప్పటికీ బాలయ్య నిర్మించడం స్వయంగా చంద్రబాబు వియ్యంకుడు కావడం లాంటి కారణాల వల్ల అన్ని నిజాలు సవివరంగా చూపించే అవకాశం లేకపోవచ్చు అనే టాక్ అయితే ముందు నుంచే ఉంది.

కాకపోతే ఆయన ప్రస్థానంలో కీలక మజిలీగా చెప్పుకునే లక్ష్మి పార్వతితో రెండో వివాహాన్ని మహానాయకుడులో చూపిస్తారా లేదా అనే అనుమానం మాత్రం ప్రేక్షకులను ఇంకా వెంటాడుతూనే ఉంది. విశ్వసనీయ సమాచారం మేరకు ఆ పాత్ర ఉంటుందట. మరీ ఎక్కువ లెంగ్త్ కాకుండా ఆవిడ ఏ సందర్భంలో ఎలా ఆయనకు దగ్గరయ్యారో కొన్ని సీన్లలో చూపిస్తారని తెలిసింది. ఇది నిజమైతే మంచిదే. ప్రపంచమంతా తెలిసిన నిజాన్ని సినిమాలో చూపించకుండా దాచిపెడితే విమర్శలు అందుకునే అవకాశం ఉంది. పైగా లక్ష్మిపార్వతిని మనసావాచా ఇష్టపడే పెళ్లి చేసుకున్నారు ఎన్టీఆర్. కాబట్టి వ్యక్తిగత అభిప్రాయాలు ఎలా ఉన్నా ఆవిడ పాత్ర లేకుండా మహానాయకుడుని ఫినిష్ చేస్తే కష్టం.

అందుకే దీని కోసం సీనియర్ నటి ఆమనిని ఎంచుకున్నట్టు తెలిసింది. బాలయ్యతో ఆమని గతంలో హీరోయిన్ గా నటించింది. శరత్ దర్శకత్వంలో ఇరవై ఏళ్ళ క్రితం వచ్చిన వంశానికొక్కడులో ఈ జంట ఆడిపాడింది. ఇప్పుడు ఇంత గ్యాప్ తర్వాత ఈ కాంబో సాధ్యమవుతోంది. యూనిట్ నుంచి సమాచారం కాదు కానీ నేరుగా పోస్టర్ రూపంలోనే లుక్ ని విడుదల చేస్తారేమో చూడాలి