ఏజెంట్ అక్కినేని దూకుడు.. క్రేజీ డైరెక్ట‌ర్ తో నెక్స్ట్ ‌మూవీ!

అఖిల్ అక్కినేని 2015లో హీరోగా ఎంట్రీ ఇచ్చాడు. ఇప్ప‌టి వ‌ర‌కు ఏడాదికి ఒక సినిమా అన్న‌ట్టుగా ఉంది లెక్క‌. అయితే.. ఆశించిన స‌క్సెస్ మాత్రం రాలేదు. బాక్సాఫీస్ వ‌ద్ద ఇంకా స్ట్ర‌గుల్ ఫేస్ చేస్తూనే ఉన్నాడు. ఇలాంటి ప‌రిస్థితుల్లో ఏడాదికి ఓ సినిమా ఫార్ములాను ప‌క్క‌న పెట్టిన‌ట్టు తెలుస్తోంది. దూసుకెళ్లడ‌మే స‌క్సెస్ మంత్రం అన్న‌ట్టుగా వ‌రుస‌గా సినిమాల‌ను ప్ర‌క‌టిస్తున్నాడు అక్కినేని వార‌బ్బాయి.

అప్ క‌మింగ్ మూవీ 'మోస్ట్ ఎలిజిబుల్ బ్యాచిల‌ర్‌' రిలీజ్ కు సిద్ధ‌మ‌వుతోంది. ఈ సినిమా థియేట‌ర్లోకి రాక‌ముందే.. 'ఏజెంట్‌' మూవీని అనౌన్స్ చేశాడు. స్పై థ్రిల్లర్ గా రాబోతున్న ఈ చిత్రానికి సంబంధించిన ఫ‌స్ట్ లుక్ కూడా విడుద‌లైంది.  గిర‌జాల జ‌ట్టు.. ర‌గ్గ్ డ్ బియార్డ్‌, చేతిలో సిగ‌రెట్ తో మాస్ లుక్ అద్దిరిపోయింది. ఈ పోస్ట‌ర్ తోనే సినిమాలో విష‌యం ఉండ‌బోతోంద‌ని ప్ర‌క‌టించేశాడు. పైగా.. ద‌ర్శ‌కుడు సురేంద‌ర్ రెడ్డి కావ‌డంతో.. మంచి అంచ‌నాలు ఏర్ప‌డ్డాయి.

అయితే.. ఇప్పుడు మ‌రో చిత్రం కూడా లైన్లోకి వ‌చ్చిన‌ట్టు తెలుస్తోంది. ప్ర‌ముఖ బ్యాన‌ర్ మైత్రి మూవీస్ తో ప్రాజెక్టు ఓకే అయిన‌ట్టు స‌మాచారం. 'ఆర్ ఎక్స్100' సినిమాతో క్రేజీ డైరెక్టర్ గా పేరుతెచ్చుకున్న అజయ్ భూపతి ఈ చిత్రాన్ని డైరెక్ట్ చేయ‌నున్న‌ట్టు తెలుస్తోంది. ప్ర‌స్తుతం 'ఏజెంట్' మూవీతో బిజీగా ఉన్నాడు అఖిల్. అటు అజ‌య్ భూప‌తి కూడా 'మ‌హాస‌ముద్రం' డైరెక్ట్ చేస్తున్నాడు.

వీరిద్దరూ తమ కమింట్ మెంట్స్ నుంచి ఫ్రీ అయ్యాక.. కొత్త చిత్రం మొదలవుతుందని అంటున్నారు. మొత్తానికి అఖిల్ సినిమాల్లో వేగం పెంచాడు. ఇక‌, స‌క్సెస్ టేస్ట్ చేయ‌డ‌మే మిగిలింది. మ‌రి, ఫ‌స్ట్ బ్లాక్ బ‌స్ట‌ర్ ఏ సినిమాతో అందుకుంటాడో చూడాలి.