ఈ ఏడాది మోస్ట్ అవైటెడ్ మూవీస్ లో ఒక‌టైన సినిమాకు ముహూర్తం ఖ‌రారైంది. ద‌స‌రా రేసు నుంచి త‌ప్పుకున్న అఖిల్ సినిమా దీపావ‌ళికి ఖాయ‌మైపోయింది. మ‌రే అరంగేట్ర హీరోకు రానంత హైప్ తెచ్చుకున్న అఖిల్.. మ‌న ఇండ‌స్ట్రీని మాత్రమే కాదు.. పొరుగు కోలీవుడ్ - బాలీవుడ్ ల దృష్టిని కూడా ఆక‌ర్షిస్తున్నాడు. హృతిక్ రోష‌న్ తొలి సినిమా విడుద‌లైన ఒక్క రోజులో స్టార్ స్టేట‌స్ సంపాదిస్తే.. త‌న సినిమా విడుద‌ల‌కు ముందే స్టార్ ఇమేజ్ సంపాదించేశాడు అఖిల్. హీరోగా తొలి సినిమాలో అఖిల్ పెర్ఫామెన్స్ ఓ రేంజిలో ఉంటుంద‌ని ఇప్పటికే అంచ‌నాలు భారీగా ఉన్నాయి.
సాధార‌ణంగా ఓ కొత్త హీరో వ‌స్తున్నాడంటే న‌ట‌న కంటే కూడా అత‌ను డ్యాన్సులు, ఫైట్లు ఎలా చేస్తాడ‌న్నదే ఎక్కువ ఆస‌క్తి రేపుతుంది. ఓ హీరో మాస్ ఇమేజ్ సంపాదిస్తాడా లేదా అన్నదానికి కూడా ప్రామాణికం ఇవే అవుతున్నాయి. ఈ నేప‌థ్యంలో అఖిల్ డ్యాన్సింగ్ టాలెంట్ గురించి చాలా చ‌ర్చ జ‌రుగుతోంది టాలీవుడ్ లో. ఇప్పటికే మేకింగ్ వీడియోల్లో చిన్న చిన్న బిట్స్ వ‌దులుతుంటేనే అక్కినేని అభిమానులు ఉబ్బిత‌బ్బిబ్బయిపోతున్నారు.
పైగా నా ఇంట్లోనా ఇలాంటి డ్యాన్సర్ ఉన్నాడు.. అంటూ నాగ్ ఆశ్చర్యపోయేస‌రికి అంచ‌నాలు పెరిగిపోయాయి. ఇక తాజాగా అఖిల్ ఇంట్రడ‌క్షన్ సాంగ్ కు సంబంధించి మేకింగ్ వీడియో చూస్తుంటే అంచ‌నాలు రెట్టింప‌య్యేలా ఉన్నాయి. యూనిట్ వ‌ర్గాలు కూడా ఈ పాట గురించే ఓ రేంజిలో మాట్లాడుకుంటున్నాయి. అంతా చూస్తుంటే అఖిల్ ఇంట్రో సాంగ్ న‌భూతో అన్న రీతిలో ఉంటుంద‌ని.. న‌వంబ‌రు 11న స్క్రీన్ లు చిరిగిపోవ‌డం ఖాయ‌మ‌ని అక్కినేని అభిమానులు సోష‌ల్ మీడియాలో కామెంట్లు చేస్తున్నారు.