ఆమె డీజిల్‌ తో... వీళ్లు పెట్రోల్‌ తో!

మొన్నామ‌ధ్య దీపికా ప‌దుకొణే హాలీవుడ్ నటుడు విన్ డీజెల్ చెవిలో గుస‌గుస‌లాడుతూ తీయించుకొన్న  ఓ ఫొటోని ట్వీట్ చేసింది. గుండుతో వెన‌క నుంచి క‌నిపిస్తున్న ఈయ‌నెవ‌రో చెప్పుకోండి చూద్దాం అన్న‌ట్టుగా ఆ ఫొటోని విడుద‌ల చేసింది. అది కాస్త ఇంట‌ర్నెట్‌ లో వైర‌ల్ అయిపోయింది. ఇంత‌కీ ఇత‌నెవ‌రు? అని ఆరా తీయ‌డం మొద‌లుపెట్టారంతా. ఆ త‌ర్వాత తెలిసిందేమిటంటే విజ‌య‌వంత‌మైన ఫ్రాంచైజీగా పేరు తెచ్చుకొన్న ట్రిపుల్ ఎక్స్ సినిమాలో  దీపికా ఆఫ‌ర్ అందుకొంద‌ని, అందులో  విన్ డీజెల్‌ తో క‌లిసి న‌టిస్తోంద‌ని! ఆ సినిమాకోస‌మ‌ని  క‌లుసుకున్న‌ప్పుడే విన్ డీజిల్‌ తో మాట్లాడుతూ ఆ ఫొటో తీయించుకొంది.

అయితే బాగా పాపుల‌ర్ అయిన ఆ ఫొటోపై ఓ  సెట్టైర్  వెయ్యాల‌నుకొన్నాడు అక్ష‌య్‌ కుమార్‌. హౌస్‌ ఫుల్ 3 సెట్ లో తోటి న‌టులు అభిషేక్ బ‌చ్చ‌న్‌ - రితేశ్ దేశ్‌ముఖ్‌ ల‌తో క‌లిసి విన్ డీజెల్‌ లా గుండుతో క‌నిపించే ఓ వ్య‌క్తిని తీసుకొచ్చి ఫొటో తీయించుకొన్నారు. దాన్ని ట్విట్ట‌ర్‌ లో పోస్ట్ చేస్తూ ``విన్ డీజిల్ దీపికాతో క‌లిసి న‌టిస్తున్నాడు కాబ‌ట్టి మేం విన్ పెట్రోల్‌ తో స‌రిపెట్టుకోవ‌ల్సి వ‌చ్చింది`` అని కామెంట్ రాశాడు. అది కూడా బాగా వైర‌ల్ అయ్యింది. ఆ ఫొటో చూసి అంతా న‌వ్వుకొన్నారు. దానికి తోడు రితేశ్ దేశ్‌ముఖ్ కూడా స‌ర‌దాగా ఓ ట్వీట్  చేశాడు. సినిమాల్లోనే కాకుండా వీళ్లు బ‌య‌ట కూడా ఇలా జ‌నాల్ని న‌వ్విస్తూనే ఉంటార‌న్న‌మాట‌.