కంచె రీమేక్.. అతనే కరెక్ట్

సౌత్ సినిమాల్ని రీమేక్ చేసి సూపర్ హిట్లు కొట్టిన బాలీవుడ్ హీరో అక్షయ్ కుమార్. మన ‘విక్రమార్కుడు’ సినిమాను ప్రభుదేవా దర్శకత్వంలో ‘రౌడీ రాథోడ్’గా రీమేక్ చేసి.. కెరీర్ లోనే బిగ్గెస్ట్ హిట్ అందుకున్న అక్షయ్.. ‘తుపాకి’ సినిమాను ‘హాలిడే’గా మార్చి మరో పెద్ద హిట్ ఖాతాలో వేసుకున్నాడు. ‘ఠాగూర్’ రీమేక్ ‘గబ్బర్’ డివైడ్ టాక్ తెచ్చుకున్నా.. కలెక్షన్లు మాత్రం బాగానే కొల్లగొట్టింది.

ఇప్పుడు అక్షయ్ కళ్లు టాలీవుడ్ లేటెస్ట్ మూవీ ‘కంచె’ మీద పడ్డట్లు సమాచారం. ‘కంచె’ను హిందీలోకి తీసుకెళ్లడానికి క్రిష్ ఇప్పటికే గట్టి ప్రయత్నాలే చేస్తున్నాడు. ప్రముఖ బాలీవుడ్ స్టూడియోలతో చర్చలు జరుపుతున్నట్లు కూడా చెప్పాడు. మొత్తానికి ‘కంచె’ బాలీవుడ్ కి వెళ్లడం మాత్రం ఖాయంగానే కనిపిస్తోంది. తాజా సమాచారం ఏంటంటే.. ‘కంచె’ మీద అక్షయ్ కుమార్ ఆసక్తి చూపిస్తున్నాడట.

మరి క్రిష్ తన ప్రయత్నాల్లో భాగంగా అక్షయ్ కు సినిమా చూపించాడో లేక.. అతనే సొంత ఆసక్తితో సినిమా చూశాడో కానీ... అతడికైతే మూవీ బాగా నచ్చిందట. ఎవరు నిర్మించినా, ఎవరు డైరెక్ట్ చేసినా.. తనే హీరోగా నటిద్దామని అనుకుంటున్నాడట అక్షయ్. ఒక్కసారి హరిబాబు పాత్రలో అక్షయ్ ని ఊహించుకుని చూడండి. ఆ గెటప్ లో పర్ఫెక్ట్ గా అనిపిస్తాడు కదూ. మొత్తానికి ‘కంచె’ సరైనోడి దగ్గరికే వెళ్తోందన్నమాట.