టాయిలెట్ మీద సినిమా చేసేస్తున్న స్టార్ హీరో

సినిమాల్లో టాయిలెట్ల గురించి ప్రస్తావన తేవడానికే ఇష్డపడరు ఫిలిం మేకర్స్. అలాంటిది ‘టాయిలెట్: ఏక్ ప్రేమ్ కథ’ అంటూ ఒక సినిమానే వచ్చేస్తోంది బాలీవుడ్లో. ఈ సినిమాలో అక్షయ్ కుమార్ లాంటి స్టార్ హీరో కథానాయకుడిగా నటిస్తుండటం పెద్ద విశేషం. ఈ ఏడాది ఎయిర్ లిఫ్ట్.. రుస్తుం లాంటి సూపర్ హిట్ సినిమాల్లో నటించిన అక్షయ్.. ‘టాయిలెట్: ఏక్ ప్రేమ్ కథ’ పేరుతో తన కొత్త సినిమాకు శ్రీకారం చుట్టాడు. ఈ సినిమా తొలి రోజు షూటింగ్ సందర్భంగా హీరోయిన్ భూమి పడ్నేకర్ తో కలిసి మురికి పట్టిన ఓ టాయిలెట్ ముందు నిల్చుని ఫొటోలకు పోజు ఇవ్వడమే కాదు.. దాన్ని ట్విట్టర్లో అక్షయ్ షేర్ చేయడం విశేషం.

శ్రీ నారాయణ్ సింగ్ అనే కొత్త దర్శకుడు రూపొందిస్తున్న సినిమా.. టాయిలెట్: ఏక్ ప్రేమ్ కథ. మోడీ సర్కారు అత్యంత ప్రతిష్టాత్మకంగా చేపడుతున్న ‘స్వచ్ఛ్ భారత్’ స్ఫూర్తితో సెటైరికల్ గా ఈ చిత్రాన్ని తెరకెక్కిస్తున్నట్లు సమాచారం. టాయిలెట్ల వినియోగం మీద సందేశాత్మకంగా ఉంటూనే వినోదాత్మకంగా ఈ చిత్రాన్ని తీర్చిదిద్దాలని భావిస్తున్నారు. మోడీ సర్కారు ఈ చిత్రానికి పన్ను మినహాయింపులు కూడా ఇచ్చే అవకాశముందట. దీనికి అధికార పార్టీ నుంచి ఫినాన్షియల్ బ్యాకప్ కూడా ఉంటుందని సమాచారం. ఒక స్టార్ హీరో ఇలాంటి కథాంశంతో మెయిన్ స్ట్రీమ్ సినిమా చేయడం ఆశ్చర్యం కలిగించే విషయమే. వచ్చే ఏడాది వేసవికి ఈ చిత్రం ప్రేక్షకుల ముందుకొస్తుంది.

Like Us on Facebook : https://www.facebook.com/Tupakidotcom/