అభిమానుల్ని ఆగమన్న అల్లు అర్జున్

‘నా పేరు సూర్య’తో గట్టి ఎదురు దెబ్బే తిన్నాడు స్టైలిష్ స్టార్ అల్లు అర్జున్. ఇది చెత్త సినిమా ఏమీ కాకపోయినా.. డిజాస్టర్ అయింది. అంచనాలకు తగ్గట్లు లేకపోవడంతో ఈ చిత్రానికి ఆశించిన ఓపెనింగ్స్ రాలేదు. బయ్యర్లు భారీగా పెట్టుబడులు పెట్టడంతో మునిగిపోయారు. బన్నీ కెరీర్లోనే అత్యధికంగా నష్టాలు తెచ్చిపెట్టిన సినిమా ఇదే అయింది. దీని తర్వాత స్టైలిష్ స్టార్ ఏం సినిమా చేస్తాడా అని అంతా ఆసక్తిగా ఎదురు చూస్తున్నారు. విక్రమ్ కుమార్ దర్శకత్వంలో బన్నీ సినిమా కమిటైనట్లుగా వార్తలొస్తున్నాయి. కానీ ఆ సినిమాను ప్రకటించడంలో ఆలస్యమవుతోంది. ఈ చిత్రానికి సంబంధించి కొన్ని రోజులుగా రకరకాల వార్తలు షికారు చేస్తున్నాయి. బన్నీ ఎంటర్ టైన్ మెంట్ కోసం పట్టుబడుతున్నాడని.. స్క్రిప్టు మార్పిస్తున్నాడని.. క్లైమాక్స్ విషయంలో సంతృప్తిగా లేడని.. ఇలా ఏవేవో వార్తలొస్తున్నాయి.

బన్నీ ఫ్యాన్స్ కూడా సోషల్ మీడియాలో ఈ వార్తల గురించి తెగ చర్చించుకుంటున్నారు. రోజు రోజుకూ ఈ ప్రచారాలు పెరిగిపోతుండటంతో బన్నీ రంగంలోకి దిగాడు. అభిమానులు తనపై చూపిస్తున్న ప్రేమకు ధన్యవాదాలు చెప్పిన బన్నీ.. తన కొత్త సినిమా గురించి ప్రకటించే వరకు కొంచెం ఓపిక పట్టాలని సూచించాడు. ఈ సినిమాను అనౌన్స్ చేసేందుకు ఇంకొంచెం సమయం పట్టొచ్చని బన్నీ చెప్పాడు. నిజాయితీగా ఒక మంచి సినిమాను అందించాలనే ప్రయత్నంలో ఉన్నట్లు చెప్పిన బన్నీ.. అందుకు కచ్చితంగా సమయం పడుతుందన్నాడు. తనను అర్థం చేసుకుంటున్నందుకు థ్యాంక్స్ చెప్పి ముగించాడు స్టైలిష్ స్టార్. బన్నీ ఇలా అంటున్నాడంటే ఇప్పుడిప్పుడే అతడి కొత్త సినిమా గురించి ప్రకటన రాకపోవచ్చన్నమాట. ఈసారి ఎట్టి పరిస్థితుల్లో హిట్టు కొట్టాల్సి ఉండటంతో బన్నీ రాజీ పడకూడదని.. ఎంత టైం పట్టినా వెయిట్ చేసి పక్కాగా స్క్రిప్టు రెడీ అయ్యాకే సినిమా మొదలుపెట్టాలని భావిస్తున్నట్లు కనిపిస్తోంది.