ఇద్దరు స్టార్స్ తో అల్లు హీరో

అల్లు హీరో శిరీష్  గత ఏడాది చేసిన ఒక్క క్షణం విషయంలో ప్రశంశలు అందుకున్నప్పటికి ఆశించిన కమర్షియల్ సక్సెస్ అయితే దక్కలేదు. కాని కథల ఎంపికలో మాత్రం వైవిధ్యం పాటిస్తున్నట్టు కనిపించింది. కెరీర్ ని చాలా జాగ్రత్తగా ప్లాన్ చేసుకుంటున్న టైంలో ఒక క్రేజీ ప్రాజెక్ట్ లో ఆఫర్ రావడం అల్లు హీరోని ఆనందంతో ఉక్కిరి బిక్కిరి చేస్తోంది. దర్శకుడు కెవి ఆనంద్ సూర్య హీరోగా రూపొందించబోయే కొత్త సినిమాలో కంప్లీట్ యాక్టర్ మోహన్ లాల్ కూడా ఒక కీలక పాత్ర చేస్తున్నారు. ఈ ఇద్దరితో పాటు సమానంగా ఉండే మరో రోల్ ని అల్లు శిరీష్ కి ఆఫర్ చేసినట్టు తెలిసింది. కథ కూడా చాలా ఇంటరెస్టింగ్ గా ఉండటంతో పాటు తన పాత్రకు మంచి స్పాన్ ఉండటం వల్ల అల్లు శిరీష్ మారు ఆలోచన చేయకుండా ఒప్పుకున్నట్టు తెలిసింది. శిరీష్ మోహన్ లాల్ తో నటించడం ఇది రెండో సారి. లాస్ట్ ఇయర్ యుద్ధ నేపధ్యంలో సాగే ఒక మలయాళ మూవీలో చేసాడు. అందులో ఫుల్ లెంగ్త్ కాకపోయినా కీలకమైన పాత్రే.

ఇప్పుడు సూర్య కూడా ఇందులో తోడవ్వడంతో కోలీవుడ్ లో అప్పుడే దీని మీద అంచనాలు మొదలయ్యాయి. కెవి ఆనంద్ సూర్యతో గతంలో వీడొక్కడే, బ్రదర్స్ రూపొందించాడు. అవి కమర్షియల్ సక్సెస్ ఎంతయ్యాయి అనే దాని కంటే వాటి టేకింగ్ మన వాళ్ళకు బాగా నచ్చింది. కాని అంతకు ముందు తీసిన రంగం ఎంత పెద్ద హిట్టో చెప్పాల్సిన పని లేదు. వాటన్నింటిని మించే సరికొత్త కథను కెవి ఆనంద్ రాసుకున్నాడని అందుకే మోహన్ లాల్ కూడా ఒప్పుకున్నారని తెలిసింది. మోహన్ లాల్ ఈ మధ్య యూత్ హీరోలతో కలిసి నటించేందుకు బాగా ఉత్సాహం చూపుతున్నారు. గతంలో విజయ్ తో జిల్లా-జూనియర్ ఎన్టీఆర్ తో జనతా గ్యారేజ్ ఇప్పుడు సూర్య ఇలా తనకు నచ్చిన ఏ అవకాశాన్ని ఆయన వదులుకోవడం లేదు. ద్విబాషా చిత్రంగా రూపొందే ఈ మూవీలో అల్లు శిరీష్ పాత్ర తీరుతెన్నులు తెలియడానికి కొంత టైం పడుతుంది కాని ఇద్దరు సీనియర్ స్టార్ హీరోల మధ్య ఇప్పుడిప్పుడే సెట్ అవుతున్న శిరీష్ కు ఛాన్స్ దక్కడం అంటే చిన్న విషయం కాదుగా.