రంగమ్మత్తపై చిరు కూడా ఇంట్రెస్ట్

జబర్దస్త్‌ యాంకర్‌ అనసూయ టాలీవుడ్‌ లో కూడా తనదైన ముద్ర వేసేందుకు తీవ్రంగా ప్రయత్నిస్తోంది. ఈ అమ్మడు తనకు వచ్చిన క్రేజ్‌ తో స్టార్‌ హీరోల సినిమాల్లో సైతం పాత్రలు దక్కించుకుంటుంది. ఒక వైపు ప్రధాన పాత్రల్లో నటిస్తూనే మరో వైపు క్యారెక్టర్‌ ఆర్టిస్టుగా కూడా నటిస్తోంది. అనసూయపై మెగా హీరోలు చాలా ఆసక్తి చూపుతున్నారు. అనసూయకు మొదట అత్తారింటికి దారేది చిత్రంలో పవన్‌ ఛాన్స్‌ ఇచ్చాడు. అయితే కొన్ని కారణాల వల్ల ఆ సినిమాను అనసూయ వదిలేసుకుంది.

అనసూయ ఒక సారి మెగా ఛాన్స్‌ ను వదులుకున్నా ఆ తర్వాత వరుసగా వస్తూనే ఉన్నాయి. ఇప్పటికే అనసూయ 'రంగస్థలం' చిత్రంలో రామ్‌ చరణ్‌ తో కలిసి చేసిన రంగమ్మత్త పాత్రను జనాలు గుర్తుంచుకున్నారు. ఇప్పటికి అనసూయ కాస్త రంగమ్మత్త అయ్యింది. చరణ్‌ మూవీలోనే కాకుండా వరుణ్‌ మూవీ 'ఎఫ్‌ 2'లో మరియు సాయి ధరమ్‌ తేజ్‌ మూవీ 'విన్నర్‌' లో కూడా అనసూయ రచ్చ చేసింది. ఇప్పుడు మరో మెగా మూవీలో ఈమెకు చాన్స్‌ దక్కింది.

మెగాస్టార్‌ చిరంజీవి 152వ చిత్రంకు కొరటాల శివ దర్శకత్వం వహించబోతున్న విషయం తెల్సిందే. త్వరలోనే ఆ సినిమా షూటింగ్‌ ప్రారంభం కాబోతుంది. ఈ చిత్రం కోసం మెగా ఫ్యాన్స్‌ చాలా ఆసక్తిగా ఎదురు చూస్తున్నారు. సైరా చిత్రం షూటింగ్‌ ఆలస్యం అవుతున్న కారణంగా కొరటాల శివ ఈ చిత్రం కోసం స్క్రిప్ట్‌ ప్రిపేర్‌ చేసి పెట్టాడు. తాజాగా మెగా 152 మూవీ కోసం నటీనటులను ఎంపిక చేయడం జరిగింది. అనసూయకు కూడా కొరటాల నుండి పిలుపు వచ్చిందని.. చిరంజీవి మరియు చరణ్‌ సూచన మేరకు ఒక కీలక పాత్ర కోసం అనసూయను కొరటాల శివ తీసుకుంటున్నట్లుగా తెలుస్తోంది. మెగా హీరోలందరిని చుట్టేస్తున్న అనసూయ నెక్ట్స్‌ టార్గెట్‌ ఎవరో మరి..!