నిర్మాత అవతారంలో మెగా ప్రిన్స్?

హీరోలు నిర్మాతలుగా మారడం అనేది ఈనాటి ట్రెండ్ కాదు. ఎన్టీఆర్.. ఎఎన్నార్ జమానా నుంచి ఉన్నదే. ఈ జెనరేషన్ లో కూడా రామ్ చరణ్.. మహేష్ బాబు లాంటి పెద్ద స్టార్ల నుంచి మొదలుపెడితే నాని లాంటి మీడియం రేంజ్ స్టార్ హీరోలవరకూ సినీ నిర్మాణంలో అడుగుపెట్టినవారే.  అయితే కొందరు మాత్రం స్వయంగా కాకుండా పరోక్షంగా నిర్మాతలుగా మారుతుంటారు. ప్రభాస్.. నాగశౌర్యలు ఇలా పరోక్షంగా తమా హోమ్ బ్యానర్ల ద్వారా సినిమాల్లో పెట్టుబడి పెట్టారు. ఇప్పుడు వరుణ్ తేజ్ కూడా అదే బాటలో ఉన్నాడని సమాచారం.

వరుణ్ ప్రస్తుతం ఒక బాక్సింగ్ నేపథ్యంలో తెరకెక్కుతున్న సినిమాలో నటిస్తున్న సంగతి తెలిసిందే. ఈ సినిమాను వరుణ్ కజిన్ అయిన సిద్దు ముద్దా నిర్మిస్తున్నారు. అయితే నిజానికి వరుణ్ తేజ్ ఈ సినిమాకు పెట్టుబడి పెడుతున్నారని.. బయటకు మాత్రం వరుణ్ కజిన్ నిర్మాతగా వ్యవహరిస్తారని టాక్ వినిపిస్తోంది.  ఈ సినిమానే కాకుండా ఫ్యూచర్లో వరుణ్ కు ఇతర  సినిమాలను కూడా నిర్మించాలనే ఆలోచన ఉందట.  రాజ్ తరుణ్ తో ఒక సినిమాను నిర్మించేందుకు సన్నాహాలు జరుగుతున్నాయట.

ఈ సినిమాను కూడా సిద్దు ముద్దా బ్యానర్ పైనే నిర్మిస్తారని.. వరుణ్ బ్యాక్ ఎండ్ లో ఉంటాడని అంటున్నారు. ఈ సినిమాతో మోహన్ అనే నూతన దర్శకుడిని టాలీవుడ్ కు పరిచయం చేస్తున్నారట.  త్వరలోనే ఈ ప్రాజెక్టుకు సంబంధించిన ఇతర వివరాలు వెల్లడవుతాయి.