నిర్మాతగా మరో స్టార్ హీరో..? మలయాళ హీరోతో తొలి ప్రయత్నం..?

ప్రస్తుతం టాలీవుడ్ లో హీరోలు నిర్మాతలు అంటూ సెపరేట్ గా లేరు. ఎందుకంటే ఇప్పుడున్న హీరోలందరూ ప్రొడ్యూసర్స్ గా మారి సినిమాల నిర్మాణంలో భాగం పంచుకుంటూ వస్తున్నారు. అక్కినేని నాగార్జున (అన్నపూర్ణ స్టూడియోస్) - నందమూరి బాలకృష్ణ (NBK ఫిలిమ్స్) - మహేష్ బాబు (GMB ఎంటర్టైన్మెంట్) - రామ్ చరణ్ (కొణిదెల ప్రొడక్షన్స్) - పవన్ కళ్యాణ్ (పవన్ కళ్యాణ్ క్రియేటివ్ వర్క్స్) - సందీప్ కిషన్ (వెంకటాద్రి టాకీస్) - మంచు విష్ణు (24 ఫ్రేమ్స్ ఫ్యాక్టరీ & ఏవీఏ ఎంటర్‌టైన్మెంట్) - కళ్యాణ్ రామ్ (ఎన్టీఆర్ ఆర్ట్స్) - విజయ్ దేవరకొండ (కింగ్ ఆఫ్ ది హిల్) - నాని - రానా దగ్గుబాటి - సుధీర్ బాబు - నితిన్ వంటి హీరోలు నిర్మాతలుగా మారి సినిమాలు నిర్మించారు. ఈ క్రమంలో మాస్ మహరాజా రవితేజ కూడా సినిమా ప్రొడక్షన్ లోకి దిగుతున్నాడని ఇండస్ట్రీ వర్గాల్లో టాక్ వినిపిస్తోంది.

సినీ ఇండస్ట్రీలో ఎలాంటి బ్యాగ్రౌండ్ లేకుండా అడుగుపెట్టిన రవితేజ.. తనదైన నటనతో ప్రేక్షకులు మాస్ మహారాజా అని పిలుచుకునే స్థాయికి ఎదిగారు. గత రెండు దశాబ్దాలుగా హిట్ ప్లాప్ లతో సంబంధం లేకుండా వరుస సినిమాలు చేస్తూ బిజీగా గడుపుతున్నారు. ఈ క్రమంలో సొంతంగా ప్రొడక్షన్ హౌస్ స్టార్ట్ చేయాలనే ఆలోచనలో రవితేజ ఉన్నాడని టాక్ నడుస్తోంది. తన అభిరుచికి తగిన సినిమాలు - కంటెంట్ ఓరియెంటెడ్ సినిమాలు నిర్మించాలని చేస్తున్నాడట. ఈ నేపథ్యంలో ఓ మలయాళ హీరోతో సినిమా చేయడానికి సన్నాహాలు జరుగుతున్నాయని ప్రచారం జరుగుతోంది. ఇందులో నిజమెంతో తెలియాలంటే ఇంకొన్నాళ్లు ఆగాల్సిందే. ఇకపోతే 'క్రాక్' సినిమాతో బ్లాక్ బస్టర్ హిట్ కొట్టి కోవిడ్ సమయంలో ఇండస్ట్రీకి ధైర్యాన్నిచ్చిన రవితేజ.. ప్రస్తుతం 'ఖిలాడి' అనే హై వోల్టేజ్ యాక్షన్ సినిమాలో నటిస్తున్నాడు.