హిట్టు కొట్టకపోయినా ఆఫర్స్ పట్టాడు

అనూప్ రూబెన్స్ ఇప్పుడు టాలీవుడ్ లో టాప్ గేర్ లో దూసుకుపోతున్న కంపోజర్. మిగతా స్టార్ మ్యూజిక్ డైరెక్టర్స్ బిజీ అయిపోవడం అనూప్ కి బాగానే కలిసొచ్చింది. దేవిశ్రీ ప్రసాద్ టాప్ రేంజ్ కి వెళ్లిపోయి అందరికీ అందే స్థాయి దాటిపోయాడు. తమన్ తమిళ్ సినిమాలతో తెగ బిజీగా ఉన్నాడు. దీంతో ఇప్పుడు పలు సినిమాలకు అనూప్ రూబెన్స్ ఆప్షన్ అయిపోతున్నాడు.

నిజానికి గతేడాది సంక్రాంతికి వచ్చిన సోగ్గాడే చిన్ని నాయన చిత్రం తర్వాత.. ఇప్పటివరకూ ఒక్క ఆల్బంతో కూడా ఆకట్టుకోలేకపోయాడు అనూప్. తాజాగా పవన్ కళ్యాణ్ కాటమరాయుడుకి అయితే విమర్శలు ఎదుర్కోవాల్సి వచ్చింది. ఓ స్థాయి సంగీతం ఉన్నా.. ఛార్ట్ బస్టర్స్ లో చేర్చేయగలిగేంతటి పవర్ ఉన్న పవన్ కు.. కనీస మాత్రం మ్యూజిక్ ఇవ్వడంలో కూడా విఫలమయ్యాడు. అయినా సరే.. ఇప్పుడు రెండు క్రేజీ ప్రాజెక్టులు అందుకోవడం విశేషం.

పూరీ-బాలయ్య కాంబినేషన్ లో వస్తున్న సినిమాకు అనూప్ నే ఎంచుకోగా.. ఇప్పుడు అఖిల్ సెకండ్ మూవీ ఛాన్స్ కూడా ఇతని ఖాతాలోకే పడిపోయింది. విక్రమ్ కె కుమార్ తో అనూప్ కి ఉన్న అనుబంధం ఇందుకు కారణం. మొత్తానికి హిట్టు కొట్టి.. ఆకట్టుకునే మ్యూజిక్ ఇచ్చి ఏడాదిన్నర అయిపోయినా.. క్రేజీ ప్రాజెక్టులు చేతిలోకి రావడం.. అనూప్ అదృష్టమే.

Like Us on Facebook : https://www.facebook.com/Tupakidotcom/