అర్జున్ రెడ్డి లైన్లోకొచ్చాడు

అప్పుడెప్పుడో ఒక టీజర్ లాంచ్ చేసి.. ఆ తర్వాత పత్తా లేకుండా పోయాడు ‘అర్జున్ రెడ్డి’. టీజర్ ఎంత సెన్సేషన్ క్రియేట్ చేసినప్పటికీ.. ఆ తర్వాత సినిమా గురించి ఎలాంటి అప్ డేట్ లేకపోవడంతో నెమ్మదిగా ఈ సినిమా వార్తల్లోంచి వెళ్లిపోయింది. టీజర్ కు అదిరిపోయే రెస్పాన్స్ వచ్చిన నేపథ్యంలో సాధ్యమైనంత త్వరగా షూటింగ్ పూర్తి చేసి ప్రేక్షకుల ముందుకు తెస్తే సినిమాకది అడ్వాంటేజ్ అవుతుంది. ఈ నేపథ్యంలో ‘అర్జున్ రెడ్డి’ కనిపించుట లేదంటూ ఈ మధ్య మీడియాలో వార్తలొచ్చాయి. దీంతో ఆ సినిమా టీం స్పందించింది. ‘అర్జున్ రెడ్డి’ విడుదలకు ముస్తాబవుతున్నట్లు ప్రకటించింది. ప్రస్తుతం డబ్బింగ్ కార్యక్రమాలు జరుగుతున్నాయని.. త్వరలోనే విడుదల తేదీని ప్రకటిస్తామని వెల్లడించింది.

‘పెళ్లిచూపులు’ విడుదలడానికంటే ముందు మొదలైన సినిమా ‘అర్జున్ రెడ్డి’. ఐతే చాలా తక్కువ బడ్జెట్లో చిన్న సినిమాగా దీన్ని మొదలుపెట్టారు. ఐతే ‘పెళ్లిచూపులు’ తర్వాత విజయ్ ఇమేజ్ మారిపోవడం.. పైగా ‘అర్జున్ రెడ్డి’ టీజర్ కు ప్రేక్షకుల నుంచి కూడా మంచి రెస్పాన్స్ రావడం.. సినిమా మీద అంచనాలు పెరగడంతో చిత్ర యూనిట్ కు కొంచె ఆర్థిక స్వేచ్ఛ వచ్చినట్లుంది. సినిమా బడ్జెట్ పెంచి.. ఫారిన్ లొకేషన్లకు కూడా వెళ్లి సినిమాను షూట్ చేశారు. స్క్రిప్టులో కూడా కొంచెం మార్పులు చేసినట్లు సమాచారం. డెహ్రూడూన్.. మంగళూరు.. ఢిల్లీతో పాటు ఇటలీకి కూడా వెళ్లిందట ఈ చిత్ర యూనిట్. ఎలాగైతేనేం సినిమా అయితే పూర్తయిపోయింది. త్వరలోనే థియేట్రికల్ ట్రైలర్ లాంచ్ చేసి.. సినిమా విడుదల తేదీని కూడా ప్రకటిస్తారట. టీజర్ లాగే ట్రైలర్ కూడా ఆకట్టుకుంటే సినిమా మీద అంచనాలు మరింత పెరగడం ఖాయం.

Like Us on Facebook : https://www.facebook.com/Tupakidotcom/