అన్న చెర్రీ వైపు.. త‌మ్ముడు మ‌హేష్ వైపు

ప్ర‌ముఖ ద‌ర్శ‌కుడు ఇవీవీ స‌త్య‌నారాయ‌ణ కొడుకులు ఆర్య‌న్ రాజేశ్‌ - అల్ల‌రి న‌రేష్‌. వీరిద్ద‌రిలో కాస్తో కూస్తో కెరీర్ బాగున్న‌ది న‌రేష్‌. త‌న మార్కులో కామెడీ సినిమాలు చేసుకుంటూ వెళ్లిపోతున్నాడు. కానీ హిట్‌ లు మాత్రం కొట్ట‌లేక‌పోతున్నాడు. త్వ‌ర‌లో వీరిద్ద‌రూ ఒక టాప్ హీరోల సినిమాల‌లో క‌నిపించ‌బోతున్నారు.

ఆర్య‌న్ రాజేశ్ అనుమానాస్ప‌దం - నువ్వంటే నాకిష్టం వంటి సినిమాల్లో హీరోగా చేశాడు. ఆ త‌రువాత నిర్మాత‌గానూ మారి త‌మ్ముడితో బందిపోటు అనే సినిమా తీశాడు. అలాగే త‌మిళంలో కూడా ఓ సినిమాను నిర్మించాడు. ఆ రెండు సినిమాలు అట్ట‌ర్ ఫ్లాప్ అవ్వ‌డంతో ఆర్ధిక క‌ష్టాల్లో ప‌డ్డాడు. వ‌డ్డీలు క‌ట్టలేక చాలా ఇబ్బందులు ప‌డ్డ‌ట్టు వార్త‌లు వ‌చ్చాయి. అల్ల‌రి న‌రేష్ అన్న‌లాంటి క‌ష్టాలు లేక‌పోయినా... సినిమాలు హిట్ కాక మంచి సినిమాల‌లో ఛాన్సులు రాక ఇబ్బంది ప‌డుతున్నాడు. అందుకే గెస్ట్ పాత్ర‌లు చేసేందుకు కూడా ఒప్పుకుంటున్నాడ‌ని స‌మాచారం.

భ‌ర‌త్ అను నేను సినిమా త‌రువాత మ‌హేష్ బాబు వంశీ పైడిప‌ల్లి సినిమాలో న‌టించ‌బోతున్నాడు. ఆ సినిమాలో అల్ల‌రి న‌రేష్ గెస్ట్ పాత్ర చేసేందుకు ఒప్పుకున్నాట్ట‌. ఇక  అత‌ని అన్నయ్య ఆర్య‌న్ రాజేష్ మ‌ళ్లీ సినిమాలో న‌టించ‌డం ప్రారంభించ‌బోతున్నాడు. రంగ‌స్థ‌లం త‌రువాత రామ్ చ‌ర‌ణ్ బోయ‌పాటి శ్రీనుతో ఓ సినిమా చేయ‌బోతున్నాడు. అందులో చెర్రీకి అన్న‌గా క‌నిపించ‌బోతున్నాడ‌ట‌. ఇత‌నికి జోడీగా జ‌ర్నీ ఫేం అన‌న్య న‌టించ‌బోతోంద‌ని స‌మాచారం. మొత్త‌మ్మీద అన్న‌ద‌మ్ములిద్ద‌రూ ఒకేదారిలోకి వ‌చ్చిన‌ట్టు కనిపిస్తున్నారు.